May mga bangkong tagsa ray guwardiya – Jack

Nasurpresa si Cebu City Councilor Sylvan Jakosalem sa seguredad sa pipila ka mga bangko sa dakbayan nga duna lay usa o duha ka mga guwardiya.

Kini nasayran sa konsehal atol sa iyang pagpakigtagbo sa mga sakop sa Cebu Bankers Association of Cebu niadtong miaging semana.

Gipasabot sa mga sakop sa Bankers Association nga walay gihatag nga guidelines ang Central Bank of the Philippines labot sa pag-hire og mga guwardiya sa bangko.

Tungod niini si Jakosalem nagplano pagpalabang og ordinansahon sa konseho sa siyudad nga mag-require sa mga bangko pag-hire og igong mga guwardiya.

Ang konsehal nga maoy chairman sa Committee on Communications and Other Utilities sa City Council  miingon nga dili mahimong butangan lang og usa ka guwardiya ang bangko.

“Risky kaayo na, mahimo na unya na silang open target sa mga tulisan, kinahanglan gyud nga labing minos dunay tulo ka guwardiya o depende sa gidak-on sa bangko,” sumala ni Jakosalem.

Ubos sa pandayon nga ordinansahon sa konsehal, dili na usab mahimo nga ang mga guwardiya maoy paablihon sa pultahan sa bangko.

“Destruction man gud na, mo-abli pa ka sa pultahan nga nagdala ka og armas mao nay nahitabo kaniadto nga ang mga guwardiya dali rang nadis-armahan,” dugang pasabot ni Jakosalem.

Ang plano sa konsehal maoy dugang lakang niini pagpugos sa mga bangko nga mapalig-on pa ang seguridad ug dili na sayon tulison.

Una nang nipalabang ang konsehal og ordinansahon sa City Council nga magpugos sa mga bangko pagbutang og CCTV camera sa ilang establisamento.

Dili hinoon hugot ang pagsupak niini sa mga sakop sa Bankers Association sa Sugbu apan kini nangayo og igong panahon pag-estalar sa maong kahimanan.

Ang nahisgutang ordinansahon gitakda nang iduso ni Jakosalem sa hawanan sa konseho alang sa ikatulo ug katapusang pagbasa.