'Palawod' nibulsa sa First Prize

Naangkon sa Palawod Festival sa lungsod sa Bantayan ang First Prize nga P1 milyon isip mananaug sa showdown sa mga festival sa labing unang Pasigarbo Festival nga gipasiugdahan sa lalawigan sa Sugbu sa Cebu International Convention Center (CICC) sa dakbayan sa  Mandaue.

Ang Haladaya Festival sa lungsod sa Daanbantayan nga nidaog sa ikaduhang pwesto maoy nibitbit sa P800,000 samtang  P700,000 ang nadala sa garbo sa Alcoy nga Siloy Festival isip mananaug sa ikatulong ganti.

Samtang nakuha usab sa Kinsan Festival sa Aloguinsan ang P600,000 sa ikaupat nga ganti, P500,000 sa Banig Festival sa lungsod sa Badian nga ika-limang ganti, P400,000 ang nagbitbit pauli sa Tostado Festival sa lungsod sa Santander sa ika-pitong ganti ug P200,000 ang Suli-suli Festival sa San Francisco, Camotes nga maoy mananaug sa ika-walong ganti.

Samtang sa Andas category maoy midaug ang Banig Festival sa Badian sa ika-upat nga ganti, ika-tulo ang Tubod Festival sa lungsod sa Tuburan, ikaduha ang Kinsan Festival sa lungsod sa Aloguinsan, ug unang ganti usab ang naangkon sa Sinanay sa Carmen, ug ikalima ang Mantawi Festival sa dakbayan sa Mandaue.

Sa street dancing competition maoy midaug sa ikaupat nga ganti ang Siloy Festival sa lungsod sa Alcoy, ikatulo ang Utanon Festival sa lungsod sa Dalaguete, ikaduha ang Kabanhawan Festival sa lungsod sa Minglanilla ug unang ganti usab ang naangkon sa Banig Festival sa lungsod sa Badian ug ang best in costume naangkon usab sa Banig Festival sa lungsod sa Badian.

Ang labing unang Pasigarbo sa Sugbu karong tuiga nga gihimo sa CICC sa reclamation area sa dakbayan sa Mandaue maoy kabahin sa mga kalihokan nga gipasiugdahan sa kagamhanan sa lalawigan sa Sugbu atol sa 439th Founding Anniversary sa lalawigan sa Sugbu karong tuiga.

Gihugopan kini sa pagsaksi sa liboan ka mga tawo uban sa mga mayor ug bise mayor, mga konsehal  ug mga barangay opisyal sa kalungsoran ug mga dakbayan sa tibuok lalawigan nga kinsa misanong sa panawagan ni Gobernador Gwendolyn Garcia alang sa hingpit nga kahiusahan alang sa pagkab-ot sa kalamboan.

Ang maong festival mao na unyay ikaduhang festival sa tanang festivals dinhi sa Sugbu sunod sa Sinulog, dunay mga kritikong nag-ingon nga hayan mamahimo na unyang managribal ang duha ka festivals sa mosunod nga mga adlaw.