Kawatan manglugos ‘pakyas

Arestado ang usa ka panday ug gibalhog sa karsel sa kapulisan human gipasanginlang nanglungkab ug nisuway pa sa paglugos sa usa ka 20-anyos nga dalaga sulod sa gikatulgang lawak niini sa Legazpi Building nga nahimutang sa  barangay Mambaling niadtong Biyernes sa kaadlawon.

Ang gibalhog og nasikop niadtong Biyernes sa hapon giila sa kapulisan nga si Hermis Basillos, 22, taga barangay Lut-ud, lungsod sa Pinamungahan, panday sa Central Lumber nga nahimutang sa Tagunol, Cogon-Pardo ning dakbayan.

Si Basillos gisikop kini diha sa iyang trabahoan pinasikad sa citizen arrest human sa follow-up operation sa mismong biktima niini inabagan sa usa ka testigo nga si Jerwin Tapales ug mga sakop sa Reaction team 1 sa Theft and Robbery Section pinanguluhan ni SPO1 Marlon Mendoza.

Ang suspek positibong giila sa duha nga maoy nilungkab, nikawat ug nisuway og lugos sa dalaga kinsa maayong pagkisi-kisi niini hinungdan nga misutoy nalang ang suspek dala ang kwartang P5,000 sa kaubang babaye sa dalaga ug ang iyang cellphone nga nagkantidad og P10,000.

Sumala pa sa imbestigasyon sa TRS, nakasulod ang suspek sa building pinaagi sa pagguba sa atubangang pultahan ug nisulod sa lawak sa dalaga, dihang nakit-an ang dalaga kalit niya kining gigakos ug gitiunan og icepick dayon mando sa dalaga sa paghubo.

Apan imbes nga motuman kalit nga nisiyagit ang dalaga ug nagpakitabang hinungdan nga nakamata si Tapales ug niadto sa lawak sa dalaga, ang suspek sa kahadlok mikaratel og dagan pagawas,

Apan sa follow-up nga operation sa kapulisan ang akusado positibong giila sa biktima ug sa saksi nga mao gyoy nisulod sa lawak sa  biktima.

Ang akusadong si Basillos nga gikahinabi sa Banat News hugtanong nihimakak sa pasangil ug nangangkong nahubog siya niadtong higayuna dihang nag-inom sila sa tindahan ug nag-videoke duol sa gipuy-an sa biktima ug aksidente ra nga nakatulog siya sa ilawom sa katre niini.

Gani mga alas 4 kapin ug kulang sa kaadlawon niadtong Biyernes ang kauban sa reklamante nibadlong kaniya sa paggawas sa lawak apan pipila ka gutlo nibalik siya kay nahabilin ang iyang sinina.

Apan nahibulong nalang siya dihang gisikop didto sa iyang trabahoan niadtong Biyernes sa hapon nga gipasanginlang nanglungkab  ug nisuway pa og pagpanglugos.