Mga ihawan sa brgy. midaghan sa Mandaue

Gibati og kabalaka ang pipila ka lumolupyo sa dakbayan sa Mandaue tungod sa kahadlok nga dili luwas sa panglawas sa tawo ang mga karneng gibaligya sa maong dakbayan niining panahona.

Mitumaw kini tungod sa pagdagsang sa daghang mga ihawan sa kabarangayan nga wala na magpakabana sa kalimpiyo niini.

Sumala pa sa mga report, dunay mga nangihaw nga diha ra kiskisan daplin sa karsada ang mga baboy nga kanunay’ng maagian sa mga tawo.

Si Dr. Romeo Capa, director sa National Meat Inspection Commission (NMIC) sa iyang pamahayag miingon nga kadto rang natatakan ug na-inspeksiyon sa mga accredited inspectors sa NMIC maoy angayang ibaligya sa kamerkaduhan.

Matud pa niya diha sa dakbayan sa Mandaue ang gitahasan mao si city veterinarian nga si Dr. Daisy Penetrante.

Gitataw niya adunay mga gibansay nga mga meat inspectors sa dakbayan ug mahimong idestino sa pagsusi sa mga pribadong ihawan nga mitumaw karon sa kabarangayan.

Ang pagtumaw sa mga pribadong ihawan sa dakbayan sa Mandaue ang natigayon tungod sa nahunong nga operasyon sa modernong ihawan sa barangay Labogon tungod sa kadaut sa mga ekipo niini.

Si Konsehal Emiliano Rosal, chairman sa committee on budget and appropriation nga nahinabi sa Banat News mipadayag nga dugay na nga gigahinan og salapi  aron ipaayo ang ihawan sa Labogon.

Apan natingala si Rosal nga hangtud karon wala pa gihapon kini mapaayo.