Tanod sa Talisay isyuhan og armas

Mga tanod sa dakbayan sa Talisay giplanohang tugotang makahupot og armas apan pilion lang matud sa hepe sa kapolisan sa dakbayan Superintendent Romeo Perigo.

Si Perigo sa pakighinabi niini sa Banat News mibutyag nga naghuwat na lang sila nga iduso sa tsirman sa kahapsay ug kalinaw sa siyudad ang mga lista sa mga ngalan sa tanod nga gipiling makahupot og armas.

Ang mga kapitan usab sa 22 ka barangay sa dakbayan ang unang mohashas o mopili sa ilang mga tanod kinsa ilang irekomendar nga makahupot og pusil ug ang mga listahan sa mga pangalan ang iduso usab ngadto sa komitiba sa kahapsay ug kalinaw.

Matud pa sa hepe sa kapolisan sa siyudad nga ang listahan sa mga ngalan sa tanod nga napili ang iduso usab niya ngadto sa provincial headquarter ug huwaton usab nila ang order gikan sa National Headquarters sa kapolisan ngadto sa Camp Crame.

Ang maong mga tanod ang sama na unya sa auxiliary police nga motabang sa kapolisan sa pagsumpo sa kriminalidad.

Gitataw ni Perigo nga ang mga tanod nga mapili ang ipaubos usab sa makuti nga proseso sama sa training ug neuro examinations ug uban pa.

Ang ilang maagian nga proseso susama sa maagian sa mga sibilyang naghupot og mga lisensyadong armas.

Apan dili buot ipasabot nga  kadtong mga napili ug naendorsong pangalan ang sigurado na gyung makahupot og armas sanglit kadto lang mga makapasar sa makuti nga training ug proseso ang makahupot niini.

Si Perigo midugang ang maong plano ang gibase sa Executive Order (EO)-546 nga giluwatan ni Presidente Gloria Arroyo.

Sa laing bahin, gawas sa nahisgutang plano ang mga tanod sa dakbayan ang napaubos na sa mga bansay- bansay kabahin sa ilang mga obligasyon sa pagtabang sa mga polis ug sa pagtubag sa mga emerhensiya.

Ang mga tanod ang dunay dakong papel sa pagtabang sa kapolisan sa pagbantay batok sa kriminalidad.