Mayoridad sa City jail inmates may kaso sa illegal drugs

Mokapin sa katunga sa mga binilanggo diha sa Cebu City Jail ang nag-atubang og kasong may kalabotan sa ginadiling drugas.

Kini base usab sa gisumiter nga report ni City Jail Warden Superintendent Efren Nemenio ngadto sa Police Coordinating and Advisory Council (PCAC).

Sa Cebu City jail adunay  2,300 ka mga binilanggo  ug 1,204 niini nag-atubang og kalapasan sa Comprehensive Dangerous Drugs Act.

Nagsunod niini mao ang mga kaso sa pagpanulis, pagpangawat, pagpatay, pagpanglugos ug uban pang mga krimen sa katilingban.

Nasayran nga sa kapin sa 2,300 ka mga inmates sa City Jail, 1,952 ka mga binilanggo ang nagpaabot pa sa husay sa ilang mga kaso.

Tungod niini, gihangop sa mga opisyal sa maong bilanggoan ingon man sa mga piniriso mismo ang programa sa Korte Suprema nga gitawag og “justice on wheels” (JOW).

Tumong sa JOW o “mobile court” mao ang pag-atiman sa mga kaso sa mga piniriso sa nagkadaiyang bilanggoan sa nasud.

Gawas sa pagpagawas sa mga inmates nga gitawag og “overstaying” tungod sa wala mabista nga kaso, tuyo usab sa JOW ang pagpaluag sa mga bilangguan.

Ang Cebu City Jail giingong naghinobra na usab karon sa mga binilanggo tungod kay giingong mokapin lang sa usa ka libo ka inmates ang kapasidad niini.

Hinuon ang mobile court gikatahong mobisita sa sunod semana sa mga bilanggoan dinhi sa Sugbo lakip na sa Cebu City Jail alang sa nahisgotang katuyoan.
Nasayran nga ang maong bilanggoan aduna karoy kapin sa 160 ka mga insular prisoner o mga piniriso nga nahukmang mabilanggo og labing minos unom ka tuig.

45 niini ang gitakdang ipadala ngadto sa New Bilibid Prisons didto sa Muntinlupa, aron adto na motiwas pag-alagad sa ilang sentensya.