Motorsiklo vs. awto 2 angol

Duha ang angol dihang midasmag ang usa ka motorsiklo sa  awto nga gikasugat niini  didto sa barangay Poblacion, Alcantara niadtong Huwebes sa alas 3:50 sa hapon. Ang mga biktima nailhan  nga usa ka Roger Dave Yusi, 19 anyos, molupyo  sa nahisgutang lugar ug ang drayber sa traysikad nga sa paghimo ning balita wala pa hiilhi ang ngalan  kay gidala  kini sa tambalanan.

Samtang si Napolen Alesna Regis, taga Carcar nga maoy drayber sa  Toyota Corolla nga gikasugat ni Yusi, wala maunsa.

Matud ni SPO3 Abec Cultura sa Alcantara Police Station nga nahinabi sa Banat News nga gikan sa lungsod sa Badian ang awto ug paingon kini sa Dumanjug ,samtang ang motorsiklo ug traysikad nga gikasugat niini paingon sa Poblacion, Alcantara.

 Paghiabot niini sa kurbadahon nga dalan sa Poblacion, ang traysikol nga nagsunod sa traysikad misuway og overtake sa naulahi, hinungdan nga didto kini mosungag sa awto nga niadtong higayona gikabagat nila sa maong dapit.

Matud pa ni SPO3 Cultura nga gumikan sa impact sa pagkabangga, misaliring ang traysikol  ngadto sa   traysikad busa pulos nangalagpot ang drayber sa motorsiklo ug sa traysikad ngadto sa sementadong karsada.

Gidali pagdala sa Badian District Hospital ang duha ka mga biktima ug gipatambalan samtang ang drayber sa Toyota Corolla boluntaryong mitahan sa iyang kaugalingon sa kapolisan.