Bulacao pilot area sa CCS

Ang Barangay Bulacao, dakbayan sa Talisay maoy napili sa National Police Commission (NAPOLCOM) nga pilot area sa Close Community System (CCS) nga gipasiugdahan ni  Regional Director Bernardo Calibo sa Napolcom.

Ang hepe sa kapolisan sa siyudad, Superintendent Romeo Perigo mibutyag kagahapon sa Banat News nga gisentro sa maong proyekto ang mga tanod aron makatabang kini sa pagsanta sa krimen.

Gipasabot sa hepe nga ang matag tanod adunay “area of responsibility” sa pagbantay sa  usa ka lugar ug kinahanglan nga iyang maila ang mga molupyo sa matag balay aron kun adunay bag-ong moabot ug mopuyo tipon sa maong panimalay may listahan na siya niini.

Matud ni Perigo nga usa sa mga rason nga dili dayon masulbad ang krimen nga nahitabo diha sa usa ka lugar, kini tungod kay wala mailhi ang mga namuyo niini.

  Ang Bulacao maoy natudlong pilot area sa CCS tungod kay ang maong dapit maoy nag-unang barangay gikan sa dakbayan sa Sugbo ug diha usab sa Bulacao kasagaran nahimutang ang mga bangko ug subdivision.

Apan gilantaw sa hepe nga kun ang maong proyekto sa NAPOLCOM  mahimong epektibo, ang ubang mga barangay sa siyudad ipaubos usab sa maong programa sa NAPOLCOM.

Ang NAPOLCOM maoy miabaga sa mga uniporme ug sapatos sa mga tanod sa Bulacao aron mahimo silang presentable, samtang ang kapolisan ug Bureau of Fire Protection  maoy  mipahigayon og bansay-bansay ug seminar sa mga tanod.

Gibutyag sa hepe nga ang nahisgutang mga tanod dili lang kutob  sa crime prevention program ang ilang atimanon, kundi  lakip  sa ilang obligasyon mao ang pagtubag sa mga emerhensiya sama sa sunog ilabi na sa mga lugar nga sudlonon kaayo ug lisod agian sa mga sakyanan sa bombero.