Prinsipal mihimakak sa pangolekta

Gipanghimakak sa prinsipal sa Guadalupe Elementary School nga siya nangolekta og P100 sa mga ginikanan alang sa ilang bayranan sa guwardiya ug janitorial services sa maong tunghaan.

Si Victoria Mansueto ang prinsipal sa maong tunghaan nga nahinabi sa Banat News nagkanayon nga nahibulong siya nganong siya ang gitumbok sa mga ginikanan nga mireklamo ngadto sa media kabahin sa alegasyon.

Matud pa niya nga wala siya mangolekta niini ug wala siyay labot sa maong koleksiyon kung duna man kay iya kini sa mga sakop sa General Parents Teachers Community Association sa ilang tunghaan.

Kagahapon gipatawag ni Mansueto ang tanan mga level heads ug nasayran nga wala pa makasugod og kolekta ang mga magtutudlo  ug miklaro usab nga di pa sila makahimo niini kung walay kasabutan sa PTCA.

Mopasumitir pa usab si Mansueto sa PTCA sa ilang liquidations ug resolution sa amotan matag tuig sa dili pa sila mohimo og laing pagpangolekta sa kasamtangang tuig.

Gipatawag usab ni Mansueto si Felisesimo “Jun” Alcover ang GPTCA President sa maong tunghaan kinsa hugot usab nga mihimakak nga sila nangolekta na sa maong kantidad.

Kini tungod kay wala pa sila makapahigayon og general assembly diin usa sa ilang tukion ang boluntaryong pag-amot sa mga ginikanan sa P203.50 alang sa panginahanglan sa maong tunghaan diin ang makabenipisyo mao ra pud ang mga estudyante.

Matud pang Alcover way pugsanay ang maong amotan gumikan kay sa milabay'ng  tuig  40 porsiyento ra sa dul-an 5 mil ka mga ginikanan ang nakabayad sa maong kontribusyon apan wala nila kini hulgaa ug gukda.

Ang bayranan nga P203.50 matag tuig maoy kuhaan sa sweldo sa gwardiya nga P72, barangay tanod (traffic) P12.50, utility P10, school publications P20, test papers P44, PTCA membership P25, Athletics P10 ug cultural P10.
Ang maong lakang sa pagtabang sa GPTCA sa Guadalupe Elementary School gikalipay og dako ni Mansueto gumikan kay kini miangkon nga kulang gyud ang gahin sa DepEd.

Sa migawas nga report sa Banat News kagahapon kini nag-ingon nga dunay mga nireklamong may mga magtutudlong nangolekta og P100 sa matag tinun-an aron ibayad sa gwardiya, ipalit og electric fan ug janitorial services.

Sa maong balita wala pasanginli si Mansueto nga mao kini ang mikolekta o mimando nga mangolekta kundili dunay mga magtutudlong nangolekta subay sa nadawat nga reklamo dinhi sa Banat News.

Ug gumikan sa maong reklamo buot ni Cebu City Schools Division Superintendent Dr. Lorna Rances nga ipatawag si Mansueto aron imbestigahon kabahin sa maong report.

Si Mansueto mibahad sa pagdangop sa abogado alang sa posible  unyang pagpasaka niya og reklamo batok sa tagsulat sa maong balita.