Napolcom mitunol na sa tseke sa biyuda ni Luage

Nakadawat og pension benefits ingon man burial assistance ang pamilya ni kanhi PO1 Noriel Luage, ang pulis nga napusilan patay  diha sa barangay Zapatera ning dakbayan sa Sugbo niadtong petsa 10 sa Disyembre sa nilabay'ng tuig.

Gibutyag sa director sa National Police Commission (NAPOLCOM) Bernardo Calibo dihang nahinabi sa Banat News nga niadtong nilabay'ng semana pormal na nilang gitugyan ang gratuity nga tseke ngadto sa asawa ni Luage nga si Rohana nga mokabat sa P103,260 mil nga maoy kinatibuk-ang sweldo sulod sa usa ka tuig niini.

Laing tseke usab ang ilang gihatag isip burial assistance nga mokabat sa P25, 815 equivalent sulod sa tulo ka bulan nga suholan sa namatay nga pulis.

Samtang gidugang ni Calibo nga gi-process na usab karun sa ilang ulohang buhatan ang monthly pension nga mokantidad og P6,884 diin 80 porsyento kini sa binulan nga suholan hangtud sa lima ka tuig ang gidugayon.

Giklaro ni Calibo nga retroactive ang maong monthly pension gikan sa pagkamatay ni PO1 Luage niadtong Disyembre hangtud sa nilabay'ng bulan sa Hulyo ug karung bulana mosugod na ang binulan nga pension niini hangtud lima ka tuig.

Matod ni Calibo gituyo ang maong paghatag og pension sa asawa niini sulod sa lima ka tuig aron paghatag og higayun nga maka-adjust kini og makapangita og kaugalingong kapanginabuhian.

Gidugang sa director nga gihatagan sab og full scholarship ang bugtong anak niini nga si Rafael Luis Catalino Luage nga kapin sa upat ka tuig pa ang pangidaron hangtud sa pagtungha niini sa kolehiyo.