Killer truck tiguwang gipisat

Nigamay ang lawas ug nigawas ang ginhawaan sa usa ka tigulang lalaki human malatayi sa dumptruck nga nagdala og yuta kagahapon sa buntag sa may eskina T. Padilla Extension ug dalan MJ Cuenco Ave. sa barangay Tejero ning dakbayan.

 Nailhan ang biktima pinaagi sa ID nga siya si Tereso Cabahug 71, taga Timboloc, Babag II dakbayan sa Lapulapu samtang ang driver sa truck nga nagtangag sa plaka RBN-295 giila nga si Jason Fernandez, 29, taga  Grayrock, City of Naga.

Sa imbestigasyon ni SPO1 Dionesio Gallo, traffic investigator sa Traffic Group gikan sa Lahug ang truck paingon sa South Reclamation Project.

Si Fernandez nagkanayon nga samtang nagsubay siya sa dalan MJ Cuenco pag-abot sa eskina T. Padilla go-signal ang traffic light apan milabang ang biktima hinungdan sa pagkapasok niini sa ilawom ug nalatayan sa ligid.

“Akong nakit-an (biktima) nga kalit nilabang, apiki naman kaayo og akong i-full brake bug-at kaayo akong karga delikado kaayo,” nagkanayon si Fernandez.

Si Fernandez gitanggong na sa detention cell sa kapolisan ug gipaabot nga pasakaan og kasong reckless imprudence resulting homicide.