Konseho sa Talisay wala pa makadesider kung Talisay PNP may commendation ihatag

Giawhag ni Konsehal Alan Bucao nga ihikling una ang gidusong resolusyon ni Konsehal Arturo Bas, tsirman sa komitiba sa kahapsay ug kalinaw nga maghatag og komendasyon sa kapolisan sa Minglanilla sa pagsulbad sa Peligro-Balasta double murder case.

Si Bas ang miduso og tulo ka resolusyon aron pag-awhag sa konseho nga pasidunggan ang Minglanilla PNP, Talisay PNP ug ang city prosecutor’s office tungod sa pagkadiskubre, pagkasikop ug pagpasaka sa kaso batok sa tulo ka mga suspek nga sila si Richard Gudelosao, Joseph Roy Cellar ug Jean Antonette Medalle.

Ang buot nga hatagan og pasidungog mao sila si Minglanilla police chief Sr. Insp. Romeo Santander; hepe sa kapolisan sa Talisay, Supt. Romeo Perigo ug city prosecutor Marshal Rubia.

Apan gisugyot ni Bucao nga ipahikling lang una ang maong mga resolusyon hangtud nga maklaro ang mga isyu kabahin sa mga alegasyon sa mga kabanay sa mga biktima batok sa Talisay police niadtong mga tungura.

Sa nigawas nga mga balita gibasol sa pamilya sa mga biktima ang Talisay tungod kay giingong wala sila tagda sa mga polis dihang sila nangayo og panabang aron makit-an ang mga biktimang sila si Eva Mae Peligro ug Gwendolyn Balasta.

Si Bucao nagkanayon nga dili sila angayang modawat og pasidungog kung sa kaulahian makwestiyon ra gihapon.

Kahinumduman nga ang kapolisan sa Minglanilla nakadawat og medalya tungod sa accomplishment nila gikan sa Police Regional Office-7 nga nadali pagsulbad ang nahisgutang krimen.

Namatikdan nga atol sa operasyon sa pagpangita sa mga parte sa mga lawas dunay kaubang mga sakop sa Talisay City Police apan sa maong awarding ceremony walay bisan usa ka polis gikan sa maong dakbayan ang gipasidunggan.