Plate number sa Everest iya sa Pajero

Nailhan na sa mga sakop sa Criminal Investigation and Detection Group-7 ang tag-iya sa plate number sa usa sa mga nasakmit nga sakyanan diha sa barangay Dawis sa dakbayan sa Talisay nga ilang gidudahang kabahin sa mga sakyanang kinawat sa laing lugar ug gidala dinhi.

Ang deputy regional officer sa CIDG-7 nga si Sr. Supt. Juanito Enguerra sa pakighinabi sa Banat News kagahapon nagkanayon nga ang plakang YCG-881 na-rekober diha gipapilit sa Ford Everest.

Ang Ford Everest kauban sa Toyota Fortuner nga nasakmit sa hiniusang pwersa sa CIDG-7 ug Provincial Investigation and Intelligence Branch niadtong milabay’ng semana.

Ang maong mga sakyanan nasakmit diha sa duol sa panimalay ni Lito Pastolo, nga sumala pang Enguerra, drayber ni Reynold dela Torre.

Si dela Torre maoy gitumbok nga tag-iya sa 13 ka mga sakyanang nasakmit sa mga sakop sa Quezon City police ug Regional Investigation Division diha sa barangay Tisa ug ingon man sa laing unom ka sakyanan nga nasakmit usab sa Mandaue City Police Office sa barangay Banilad sa dakbayan sa Mandaue.

Ang gisakmit sa kapolisan mao ang usa ka Fortuner nga kolor itom nga may plakang YDC-961 ug Ford Everest nga kolor brown nga may plakang YCG-881.

Apan nasutang ang plakang gipatapot diha sa Ford Everest dili gyud iya kundili iya sa usa ka Mitsubishi Pajero nga nakarehistro sa pangalan sa usa ka Arsenio S. Kho, Jr. nga taga 18th Street sa Cagayan de Oro City.

Matud pang Enguerra ang maong plakang YCG-881 unang narehistro sa Malaybalay, Bukidnon ug sa ikaduhang pag-rehistro diha na sa Tagbilaran City, Bohol niadtong Septembre 19, 2006.

Katapusan kining narehistro niadtong Enero 18, ning tuiga sa pareho gihapong tag-iya. Matud pang Enguerra ilang imbitaron ang tag-iya aron pangutan-on kung nganong ang plaka sa iyang sakyanan naabot ngadto sa Ford Everest.

Kung duna may moanhang tag-iya sa Everest hayan makasuhan kini gumikan sa paggamit og plaka sa laing sakyanan.

Samtang gisubay pa usab karon ang plakang YDC-961 sa Fortuner kung kang kinsa kini narehistro ug kung mao ba gyud kini ang sakyanang gitagan-an        niini.

Wala pa gihapon mahikay sa PNP Crime Laboratory ang macro-etching sa maong mga sakyanan sanglit duna pay laing unom ka sakyanang sinakmit usab sa Mandaue City Police Office nga ilang himuan og macro-etching.

Matud pang Enguerra ilaha pa usab subayon kung kang kinsa narehistro ang mga sakyanan base unya sa makuhang resulta sa macro-etchings nga itandi ngadto sa record sa mga manufacturer nga Ford ug Toyota.