Lawas patay gilubong na

Usa ka lawas patay sa wala hiilhing tawo nga naglutawlutaw sa kadagatan sa Madredijos, Bantayan Island gilubong nalang sa mga mananagat sa maong lungsod kay nadugta na kini ug puwerting bahoa.

Si Roque Yee, 40, taga barangay Malbago, Madredijos maoy mipahibawo bahin sa nakit-an niyang patay’ng tawo nga naglutaw sa dagat sa barangay Mancilang sa maong lungsod niadtong Domingo sa udto.

Si SPO1 Manolo Jo sa Madredijos Police Station mibanabana nga ang patay’ng lawas nagpangidaron og 40 anyos pataas nga nagsul-ob og senina nga pink, nag-brief og  itom nga may markang  Yoshi Sport.

Si Dr. Elma Chin sa Madridejos maoy nagtugot sa pagpalubong sa maong patay’ng lawas sa menteryohan municipal sa lungsod tungod kay walay mga tagtungod nga mikuha niini.