Gitanggong na sa kapulisan sa dakbayan sa Sugbu ang usa ka polis nga sakop sa Police Security Protection Group (PSPG-7) kinsa gitumbok nga gipasanginlang aksidenteng nakapatay sa barkada sa tawong giingong gibukbok niini og armas kay nangulata og asawa ug nanghasi sa ilang dapit.
Ang gitanggong mao si PO1 Joseph Villamor tungod sa pagkaigo sa walang mata ni Allen Regner, 30, kagahapon sa buntag diha sa sitio Ponce barangay Carreta ning dakbayan.
Sa gihimong imbestigasyon ni SPO2 Rey Cuyos sa Homicide Section ang biktima gikatahong diha sa luyo ni Villamor atol sa komosyon dihang ang maong polis mipasulod sa barkada sa namatay nga si Glenn Galan Caval, 35, usa ka plumber.
Ang asawa ni Caval nga si Teresa dihang gihinabi sa mga tigbalita nagkanayon nga niana pang alas 10 sa gabii nag-inom ang iyang bana ug ang namatay apan nabuntagan nalang kagahapon wala pa gihapon sila maghuman ug nanghagad pa hinuon si Regner nga mag-inom.
Gumikan niini gikasuko kini og maayo ni Teresa kinsa miresulta sa panaglalis sa managtiayon ug nahitabo na ang komosyon, sumala pa nga nabukbukan pa ni Allen ang asawa diha sa nawong hinungdan nga naalarma si Villamor pagkadungog sa siniyagitay diha sa iyang mga silingan ug niresponde.
Si PO1 Villamor nga nahinabi sa Banat News nagkanayon nga nagtapis pa siya og tuwalya niadtong tungura ug nakadungog nga dunay nagsiniyagitay ug nanawag og polis maong dali siyang miresponde ug dala ang iyang Taurus service pistol human makit-ing nagbitbit og botelya si Allen.
Matud pa ni Villamor iya untang gipasulod si Allen niadtong tungura apan sa pagtukmod niya niini kalit nalang siyang nakadungog og buto sa armas ug diha nalang niya nahibaw-ang natumba si Regner kinsa diha niadtong tungura nagbarog dili layo sa iyang likod.
Si Teresa sa iyang bahin nitug-an nga iyahang nakit-ang gibukbok ni Villamor ang iyang bana diha sa likod aron kini pasudlon ginamit ang usa ka gihulagway niyang taason nga matang sa pusil, apan kini kalit nibuto ug naigo si Regner diha sa likod sa maong polis.
Si Villamor mitug-an nga wala siya masayod nga nibuto ang iyang armas niadtong tungura ug mihimakak nga taas nga matang sa pusil ang iyang gibitbit sanglit sumala pa niya nagdala siya niadtong tungura og baton.
“Ang sa akoa wala koy sure kung nakabuto ang akong armas but to erase doubts akong gisurender akong armas aron mapa-ballistics,” asoy pang Villamor sa mga tigbalita kagahapon.
Si Villamor gipaubos sa paraffin test sa PNP Crime Laboratory 7, boluntaryo usab niyang gitahan ang Taurus .9mm caliber pistol uban sa 14 ka mga buhing bala ug magazine.
Giinsister ni Villamor nga naka-safety ang iyang armas dihang iyang giulang ang nagkarambola nga magtiayong Caval.
Si Villamor daling nitawag og tabang ug ang nirespondeng mga sakop sa Mobile Patrol Group nga sila si PO3 Jaime Aparri ug PO1 Norman Rupita mao nay nidala kang Regner sa Cebu City Medical Center apan kini namatay pipila ka gutlo gikan pag-abot niini.
Apan sa kinalit nga kalamboan kagahapon bahin sa insidente, gipahibalo ni Dr. Gloria Duterte sa CCMC nga duna silay narekober sa bulsa ug posesyon ni Regner nga P116.25 nga salapi; usa ka metal case nga may sulod nga 17 ka gagmay'ng paketeng shabu; pito ka buhing bala sa .45 caliber ug duha ka basiyo sa wala matinong kalibre sa bala; duha ka cellphone; tulo ka silver nga mga kwintas; usa ka bronse nga singsing; usa ka pustiso ug bakos. (Uban ni Guam Logroño)