Illegal Sto. Niño vendors demolison

Gitakda na usab nga i-demolish ang mga estrakturang ilegal nga gipangtukod sa manindahay og imahen sa Santo Niño diha sa dalan D. Jakosalem ug eskina niini sa Osmeña Blvd. nga giingong nakaali sa ganghaan sa nahisgutang simbahan.

Dul-an sa 20 ka mga  illegal structures ang gikataho nga gipangtukod sa nahisgutang dapit ug planong laruton karong adlawa sumala pa ni Urban Poor Consultant sa City Hall Gerry Marquez.

Si Marquez maoy niduso sa listahan sa mga tag-iya sa i-demolish nga mga estraktura ug kini gipirmahan na ni Mayor Tomas Osmeña ug gitagalan lang sila og 48 oras pagguba sa ilang mga pwesto.

Sumala pang Marquez nga si Basan Amora, lider sa asosasyon sa mga vendor sa maong lugar nag-ukupa og tulo ka stalls nga gitukod diha sa dalan Jakosalem nga alang unta sa orihinal nga mga manindahay.

Subay niini niingon si Marquez nga iyang imbentaryohon ang mga okupante diha sa nahisgutang mga stalls aron ipatuman usab ang one family, one stall.

Kini nagpasabot nga bawion unya ang ubang stalls nga mosobra og usa. Ang maong mga vendors makadaghan nang gi-demolis sa dakbayan ug gitukuran og mga stalls alang kanila diha sa dalan Jakosalem apan makadaghan gihapong misupak niini.

Apan niining higayuna gipasalig ni Marquez nga siya mismo maoy mo-monitor sa maong dapit human sa demolisyon.