Mingla’ PNP gipasidunggan sa PRO-7

Unom ka mga polis lakip na niini ang ilang hepe sa Minglanilla Police Station ang gipasidunggan ug gihatagan og mga Medalya ng Kasanayan gumikan sa daling pagkasulbad sa kaso sa ‘chop-chop’ ladies nga nahitabo niadtong  milabay’ng semana.

Si Police Regional Office-7 deputy director for administration, Chief Supt. Federico Terte maoy misul-ob sa maong mga medalya kanila ni Sr. Insp. Romeo Santander hepe sa kapolisans sa maong lungsod.

Samtang ang iyang mga sakop nga sila si SPO1 Procolo Ando,Jr.; PO3 Allen Garciano; PO3 Roland Canillo; PO2 Avelino Selloria ug PO1 Rodulfo Quilala nakadawat usab sa susamang medalya.

Ang pasidungog nasubay sa rekomendasyon sa director sa Cebu Provincial Police Office nga si Sr. Supt. Carmelo Valmoria human masikop nila ni Santander ang mga suspek sa pagpatay ug gitagod tagod nga mga babayeng sila si Eva Mae Peligro ug Gwendolyn Balasta niadtong Hulyo 24 sa hapon diha sa ilang balay sa Maghaway dakbayan sa Talisay.

Pipila sa mga parte sa lawas nga gisulod og garbage bags nadiskubrehan nianang pagkasunod adlaw diha sa Campo 8 sa lungsod sa Minglanilla ug nadugangan pa kini sa misunod nga mga adlaw.

Nadakpan dayon ang tulo ka mga suspek nga sila si Richard Gudelosao, igsuon sa pamanhunon ni Peligro, Joseph Roy Cellar ug live-in partner ni Gudelosao nga si Jean Antonette Medalle isip kakunsabo tungod sa paghipos niini sa mga ebidensya.

Ang duha ka lalaking suspek miangkon sa krimen samtang si Medalle kusganong miinsister nga gipugos siya og palimpyo sa crime scene sa duha ug gumikan sa hulga ni Cellar nituman siya niini, nidugang hinuon siyang nasayod na siya sa plano apan wala gyud siya aktwal nga miapil sa pagpatay.