Lawas sa lake bulit sa bala

Nabulit sa samad sa mga bala ang lawas sa usa ka 19 anyos nga lalake nga giluthang sa wala hiilhing mga kriminal sa alas 12:25 kagahapon sa kaadlawon diha sa Sitio Bayong, barangay Tisa, ning dakbayan.

Ang biktima nailhan nga si Jonas Dingding, usa ka estambay nga nagpuyo sa nahisgutang lugar.

Sa imbestigasyon nila ni SPO4 Alex Dacua ug mga kaubanan sa Homicide Section sa Cebu City Police Office nasayran nga ang biktimang si Dingding uban sa iyang igsoon nga si Geovani ug mga silingan,  naglakaw sa karsada sa ilang lugar dihang naagian niini ang tulo ka tawo nga  nagbarog-barog daplin sa dalan.

Nagtuo ang biktima nga kauban nila sa Tau Gamma ang maong grupo kay mihisgot man kini sa ngalan sa grupo ug dihang gitubag sila sa biktima, kalit lang namusil sa naulahi.

 Gidali pagdala sa  iyang igsoon ug mga kauban ang biktima ngadto Cebu City Medical center samtang ang mga suspetsado maoy gipangita pa  sa  kapolisan human kini manibat human sa hitabo