Koreano gidakop kay naghubo sa dalan
Ang gidakop mao si Kim Yeong Jun, gibana-banang nagpangidaron og kapin 40 ngadto sa 50 anyos, temporaryong nagpuyo diha sa maong condominium.
Naglisod ang kapolisan sa pagkuha sa hustong detalye sa rason sa iyang pagsuroy-suroy nga walay sapot diha sa maong dapit apan tungod sa reklamo sa mga residente siya gisikop ug gidala diha sa Compact Station sa atbang sa City Hall.
Matud pang Sr. Insp. Ryan Devaras, hepe sa maong buhatan kumpleto sa mga dokumentos ug papeles ang maong langyaw, ang Compact Station gitukod alang sa pag-atiman sa mga reklamo sa mga turista ug uban pang mga problema may kalambigitan kanila.
Gikatahong dihang ilang gipangutana wala gyud kini motug-an sa hinungdan sa iyang paghubo apan dako ang pagtuo ni Devaras nga may personal nga problema ang maong Koreano apan di lang buot nga motug-an.
“Pagdala nila sa among office mura lang siyag wala sa iyang kaugalingon pero wala man sad manimahong bino, dili man sad siya moestorya og maayo kay private kaayo siya nga tawo, di mo-divulge pero naa gyud toy problema,” pasabot ni Devaras sa Banat News.
Gisuwayan og dala sa imbestigador nga si SPO4 Edmund Mola si Kim ngadto sa Bureau of Immigration sa dakbayan sa Mandaue apan gikatahong wala kini dawata tungod kay kumpleto kini sa papeles.
Tungod niini midangop na usab si Molas sa Korean Consulate apan sa gihapon wala kini dawata ug wala gani panumbalinga sumala pa sa mga polis hinungdan nga nakatulog kini og duha ka gabii diha sa ilang buhatan.
Kagahapon sa buntag gibuhian ang nahisgutang langyaw human kini motug-ang mouli na kini sa ilang nasud.
- Latest
- Trending
