'Betsen' di katuuhang makadaut

Dili kumbinsido si Cebu City Councilor Christopher Alix nga makadaut ang usa ka sagol sa pagkaon nga makapadugang sa kalami niini sa kahimsog sa panglawas sa usa ka tawo bisan pa man kung gikumpirmar na sa Bureau of Food and Drugs (BFAD) nga kini dunay dili maayong epekto nga posibleng moresulta sa pagkamatay sa tawo.

Gani  midugang ang BFAD nga mas “fatal” ang epekto niini sa kahimsog sa tawo kung kini kan-on nga dili isagol sa pagkaon.

Ang Monosodium Glutamate (MSG)( mas nailang betsen) maoy usa ka food additive o flavor enhancer nga isagol sa gilutong sud-an aron kini mas molami pa kan-on.

Apan alang sa BFAD, kinahanglang hinay-hinay lang ang paggamit niini ug dili daghanon tungod kay ang sobrang MSG intake makadaut sa lawas.

Matud ni Alix nga bisan unsa nga butang dinhi sa kalibutan kung pasobrahan gyud ang paggamit siguradong makadaut sa tawo.

Ang konsehal nga maoy chairman sa Committee on Health sa City Council mitataw nga kung makadaut pa ang maong kemikal dugay na unta kining gi-ban dinhi sa nasod.

Midugang hinoon ang konsehal nga aron mabug-os ang huna-huna sa tawo ug malikayan ang mga pagduda, mas maayong dili na lang mogamit sa nahisgutang flavor enhancer.

“Wala may problema kung ato pud nang likayan kay sa pagluto dili man lang siguro betsen maoy makapalami, mas daghang lamas mas lami ang pagkaon, di ba?” miingon ang konsehal.

Ang BFAD mipagawas sa ilang pasidaan human usab mabutang sa kritikal nga kahimtang ang kinabuhi sa usa ka 3- anyos nga bata didto sa Sagay City, Negros Occidental human makakaon sa maong kemikal dihang nasaypan kini nga asin nga giingong maoy sagad nang himoon niining ipares sa kan-on isip sud-an.

Ang maong kemikal sagad usab masaypan nga asukar ug masagol sa kape, gawas nga masaypan usab nga iodized salt nga moresulta na hinuon sa sobrang paggamit niini.

Tambag sa BFAD nga ilain nalang kini og butang ug butangan og pangalan aron dili masaypan sa paggamit.