Mga pasahero, drayber gitulis

Mga pasahero ingon man driver sa usa ka pasaheroang jeepney ang gipanghimulbulan sa tulo ka wala pa mailhing mga tulisan nga nagpakaaron- ingnong mga pasahero niadtong Sabado sa gabii diha sa New Imus Road sa barangay T. Padilla ning dakbayan.

Ang mga tulisan gikatahong pulos armado og mga icepick ug mideklarar og tulis pag-abot diha sa nahisgutang dapit sulod sa usa ka 13C nga rotang pasaheroan.

Ang mga biktima’ng way nahimo kundili paghatag nalang sa ilang mga butang giila sa kapulisan nga sila si Fritz Tiffany Ociers, 18 barangay Tipolo Mandaue, nakuhaan sa P4 mil nga balor sa cellphone; Ziara Piquero, 17, taga Ponce Capitol Hills, P2 mil nga balor sa cellphone, Philip Francis Capala, 17, Poblacion Talisay City, P6,700 nga balor cellphone.

Laing gikuhaan og cellphone mao sila si Arland Mancao, 27, Poblacion Talisay City nakuhaan sa iyang cellphone nga nagkantidad og P2,300 ug silver nga kwintas nga nagkantidad og 700; Maristela Ariel, 19, taga Paknaan Mandaue City nakuhaan usab og cellphone nga nagkantidad og P3 mil; Chinlee Mancao,  21, taga dalan Sanciangko nakuhaan gihapon og cellphone nga nagkantidad og P8 mil cellphone, Kathlene Andaya, 17, taga Nasipit, Talamban nakuhaan og shoulder bag nga may mga importanteng dokumento, pitaka ug kuwarta.

Apan wala pa gyud matagbaw ang mga tulisan hasta ang drayber nga si Johnny Purudiang, 39, taga barangay Cabadiangan lungsod sa Compostela giapil sa gikuhaan og pitaka nga may sulod nga P800 pesos nga iyang kinitaan.

Sumala pa sa kapolisan ang mga tulisan yano usab kaayong nanganaog ug nilakaw padulong sa dalan F. Villa.

Padayon pa karong gisusi sa kapolisan kung si kinsa ang maong mga lalaki nga gituuhang residente ra usab sa maong lugar.