Nilikay sa checkpoint gipatay

Usa ka habal-habal drayber ang namatay human maigo sa walang paa ug gikatahong naigo sa kinatawo samtang samdan usab ang iyang silingan nga pasahero human sila gipauwanan og mga bala mga alas 11:23 sa gabii niadtong Sabado sa barangay Maslog dakbayan sa Danao.

Namatay si Gracer Amor, 23, usa ka habal-habal drayber nga taga barangay Mulaw lungsod sa Compostela samtang nasamdan usab sa ubos sa pusod ang iyang silingan nga si Ronald Avila, 27, rattan worker.

Matud pa ni SPO4 Teofilo Deguilmo sa Danao Police Station nga gikahinabi sa Banat News, si Amor ug Avila luwan og motorsiklo subay sa national highway.

Ang duha sakay sa XRM kolor pula nga may plakang IJ-4812 paingon sa barangay Maslog sa maong dakbayan apan dihang nakakita sa checkpoint nilikay kini ug mibalik sa agi paingon sa sitio Mahayahay sa nahisgutang barangay.

Dihang diha na sila sa maong lugar gikatahong dunay mga wala mailhing lalaki ang gikatahong mipauwan  kanila og mga bala.

Ang duha pulos nangaigo diin si Amor naigo sa walang paa nga milapos sa iyang kinatawo samtang naigo sa ubos sa pusod si Avila.

Ang duha gidali sa pagdala ngadto sa Danao District Hospital apan si Amor gideklarar nga dead on arrival sa mga doktor.

Atol sa gihimong follow-up sa crime scene kagahapon sa buntag narekober sa kapolisan ang duha ka mga kabhang sa balang gituohang gikan sa carbine rifle.

Si SPO1 Renante Manulat sa traffic divison sa dakbayan sa Danao mitug-an sa Banat News nga ang mga biktima gikatahong milikay sa maong checkpoint base sa mga gitug-an sa mga residente sa lugar.

Wala pa hinuon usab matino sa kapolisan kung nganong milikay ang duha sa checkpoint ug adto na hinuon misubay sa nahisgutang sitio nga gihulagway nilang hilit.

Wala pa usab matino sa kapolisan kung si kinsa ang namusil sa duha tungod kay buto-buto nalang sa armas ang nadungog diha sa maong dapit.