Walo ang naangol human magsungag ang multicab sa laing duha ka mga sakyanan alas 10 pasado ang takna sa miaging gabii sa dalan A. S. Fortuna sa dakbayan sa Mandaue.
Giila ni PO2 Rubem Serdaña sa traffic division sa Mandaue City Police Office (MCPO) ang mga naangol nga mao sila si Jenelyn Bedana, 18, Elmer Sordala, 20 Romulo Quijano, 21, Kenetth Dalagan, 18 ug Jamil Tuico, 20 nga pulos taga dakbayan sa Sugbu.
Gimaneho ni Alvin Avila, 23, nga taga Tunggo Banilad sa dakbayan sa Mandaue ang multicab nga giluwanan sa mga biktima nga nagdala sa plate number KCY 297.
Ang gikasungag nga duha ka mga sakyanan mao ang Honda Civic nga nagdala sa plate number GZZ 542 nga gimaneho ni Romano Salinas, taga Lahug, dakbayan sa Sugbu lakip na ang tulo ka bata niining mga pasahero nga sila si Piona Salinas, 11, Choy Salinas ug Pat Pajina Saberino, 13.
Matud pa ni PO2 Sardena nga nagdagan ang multicab nga gimaneho ni Avila dihang sa pag-overtake niini iyang nasungag ang Honda Civic ni Romano ug napagan pa ang Nissan Terrano nga gimaneho ni Gaudencio Gotero, 54, taga Banilad sa dakbayan sa Mandaue.
Si PO2 Sardena miingon nga dali nga gidala sa tambalanan ang mga biktima ug tukmang lakang ang gihimo sa kapolisan batok sa mga drayber sa nagkasungag nga sakyanan.