Babaye naigo sa saag nga bala

Usa ka babayeng padulong unta mosakay og ferry boat ang naigo sa saag nga bala human ang guwardiya sa maong ferry boat company nakiglayog  sa usa ka tawong gibadlong diha sa Muelle Osmeña Warf sa barangay Poblacion dakbayan sa Lapulapu sa milabay'ng hapon.

Ang tawong gipusil giilang si Julius Reyes, 26, residente sa BM Demataga St. Poblacion sa samang dakbayan samtang ang naigo sa saag nga bala mao si Ma. Agnes Quintano, 23,  lumad sa Loon Bohol  ug temporaryong nagpuyo sa barangay Pajo dakbayan sa Lapulapu.

Base sa imbestigasyon ni PO3 Manolito Abellanosa sa Homicide Section sa kapolisan sa dakbayan sa Lapulapu kasamtangang naligo sa dagat si Reyes diha sa agianan sa Metro Ferry.

Kini gikatahong gidili sa tag-iya sa Metro Ferry hinungdan nga gibadlong kini sa guwardiyang si Joseph Narandan, 38, residente sa barangay Kalubihan dakbayan sa Sugbu sakop sa Kampilan Security Agency nga nadestino sa maong dapit.

Apan gikatahong gikasuko kini ni Reyes ug mikawas sa dagat dayong sukmag kang Narandan hinungdan nga mibunot sa kalibre .38 ang guwardiya ug misangpot kini sa inilugay sa armas tali sa duha.

Atol sa pag-inilogay sa duha kalit kining mibuto ug didto kini miigo sa tuong paa ni Quintano nga milinya sa pagpalit og ticket aron unta mosakay sa Metro Ferry padulong sa dakbayan sa Sugbu.

Human niini nakahigayon si Narandan pagpusil sa abaga ni Reyes hinungdan sa pagkalandig niini sa tambalan sa Lapulapu District Hospital, hinuon luwas na kini sa makuyaw nga kahimtang ingon man si Quintano.