Inasal sa Talisay di makalanag

Si Talisay City Administrator Richel Bacaltos  mipasalig  sa publiko nga dili mahitabo  sa dakbayan sa Talisay ang nahitabo sa lungsod sa Argao diin 13 ka tawo ang nangalanag sa lechon nga baboy sa miaging Domingo.

Si Bacaltos mapasigarbuhon kaayo sa Talisay tungod kay nanggungis na kining siyudara sa kabantugan sa kalami ug kahinlo sa iyang inasal.

Gani karong Oktubre 15 magsaulog na usab kini sa ika-upat nga tuig sa iyang “Halad Inasal Festival” atol sa kapistahan sa patrona sa Talisay Santa Teresa de Avila.

Si Bacaltos sa pakighinabi  sa Banat News kagahapon nagkanayon nga ang baboy nga gipang-lechon sa mga negosyante og inasal  sa Talisay  limpiyo kaayo tungod kay diha kini ihawa sa ihawan sa siyudad nga may “double A” standard nga giluwat sa National Meat Inspection Services (NMIS) niadtong Hulyo 22, 2008.

Matud sa city administrator nga ang mga negosyante og inasal sa Talisay may certification gikan sa siyudad sa pagmatuod nga maayo og kalidad ang ilang lechon.

Si Bacaltos nagkanayon nga ang nahitabong insidente sa Argao naghatag og  leksiyon nga mapahigpitan pa ang pagsusi sa mga hayop nga ihawon diha sa ihawan sa maong dakbayan.

Kun limpyo ug walay sakit ang hayop nga ihawon, natural limpyo usab kaayo ang karne niini ug mao kini ang kalidad nga gibantayan sa mga inasal nga baboy diha sa Talisay aron pagsiguro nga walay tawong malanag niini.

Sa ipahigayong “Pasigarbo sa Sugbu” sa kagamhanan sa probinsiya niining buwana, ang “Halad Inasal Festival” maoy entry sa Talisay aron sa pagpaila sa lamiang lechon nga baboy sa dakbayan.