Dengue gikabalak-an

Gikabalak-an ang pag-usbaw  sa gidaghanon sa matakboyan sa sakit nga dengue niining panahon sa tinguwan diha sa Mandaue City nga maoy nakaaghat kang Mandaue City Health Officer Dr. Oscar Quirante sa pag-awhag sa mga lumolupyo sa padayon nga pagpanglimpiyo.

Matud pa niya nga ang pagpanglimpiyo uban sa search and destroy operation sa malagmit puy-anan sa mga lamok nga dengue maoy labing epektibong paagi  aron kalikayan ang maong sakit.

Si Cebu Provincial Health Office Chief Dr. Cristina Giango  nagpadayon sa iyang pag-awhag sa mga lumolupyo dinhi sa Sugbu sa pagpanglimpiyo sa ilang palibot  kanunay ilabi na karong ting-uwan na.

Kini pagahimoon pinaagi sa pagyabo sa napundo nga tubig nga anaa sa lata, ligid, mga balde, plastic ug uban pa.

 Nasayran sa Banat News  gikan sa Regional Epidemiology and Surveillance Unit (RESU) 7 sa Department Of Health (DOH nga mokabat sa 76 ang namatay sa Central Visayas sukad sa Enero hangtod sa Hulyo 26 niining tuiga gumikan sa dengue.

Misaka kini og 29 porsiyento  kun itandi sa mga nabiktima ug namatay sa susamang periodo sa miaging tuig.

Sa nagkadaiyang tambalanan sa Region 7  nasuta nga mokabat sa 2,605 ang mga pasyente nga natakbuyan sa sakit nga dengue sumala   sa mga tinugyanan sa kasanihan ning rehiyon.