Tulisan ambak dagat sikop

Usa sa duha ka tulisan nga miambak sa dagat kay gigukod sa kapolisan sa lungsod sa Lilo-an  nadakpan gyud apan ang iyang kauban maoy nakasibat kay puwerting kusoga molangoy sa dagat.

Si PO3 Ricardo Enriquez nga nahinabi sa Banat News miila sa nadakpan nga si Earl Kevin Acebedo Manila, 21,  ulitawo, nga taga Basak, dakbayan sa Mandaue samtang ang nakasibat  nailhan lang sa ngalang Mico nga silingan niini,

Giila ni PO3 Enriquez ang biktima nga gitulis sa mga suspetsado nga mao si Roger Coñeda Gadiano,  43 , minyo, nga taga barangay Canduman sa dakbayan sa Mandaue ug drayber sa multicab nga pasaheroan.

Si PO3  Enriquez miingon nga nagpakaaron-ingnong pasahero ang duha ka tulisan nga misakay sa multicab nga gimaneho ni Gadiano apan sa ilang paghiabot sa awaaw nga bahin sa barangay Jubay, kalit kining mideklarar og tulis uban sa paglanit sa ilang armas de fuego.

Matud pa ni PO3 Enriquez nga gihatag ni Gadiano ang pitaka nga gisudlan lamang og P300 nga kinitaan niya sa tibuok adlaw. 

Human makuha ang kuwarta nanganaug dayon ang  mga tulisan samtang ang biktima misirit usab ngadto sa buhatan sa kapolisan.

Gisundan dayon sa kapolisan ang maong mga tulisan nga naglakaw pa sa karsada, apan dihang nakaalinggat kining naa na sa ilang likod ang mga polis nagdungan kinig pangambak sa dagat.

Si Manila nga di kaantigo molangoy maoy nasikop sa kapolisan apan si Mico nakaikyas gumikan sa kakusog molangoy niini ug karon nagtingkagol na sa prisohan ang dinakpan.