Nag-unay og dunggab sa iyang kaugalingon ang usa ka amahan human niini aksidenteng nalubaan ang iyang singko anyos nga anak nga babaye dihang ang suspek niuling nakainom.
Ang insidente nahitabo diha sa barangay Bagakay lungsod sa Sogod niadtong Miyerkules sa alas 7:10 sa gabii diin usa ka Angel Mae Ponteros Presillas,5 anyos, kinsa nadunggaban diha sa dughan sa amahang si Gilbert Villaro Presillas, 44.
Matud ni SPO2 Gualberto Arnado sa Sogod PNP dihang nahinabi sa Banat News nakainom ang amahan nga nauli sa ilaha apan ang naabtan niini mao ang banha kaayong walo ka mga anak tungod kay dunay naghilak ug duna say nagpabadlong hinungdan nga iyaha kining gipangasab-an.
Wala kini ikahimuot sa iyang asawa maong gisumbalik niini og kasaba ang suspek hinungdan nga nigawas sa balay ang naulahi, apan gikatahong nisunod ang biktima nga nagbitbit og kutsilyo maong gikuha kini sa suspek.
Ug gumikan sa kapungot niini gitampok sa suspek ang kutsilyo sa pultahan apan nilapos kini ug naigo sa dughan ang bata kinsa niadtong tungura padulong untang mogawas.
“Tungod siguro sa kapungot aning amahan gitampok niya ang kutsilyo sa pultahan nga ginama ra gud og amakan,” asoy pa ni Arnado.
Dihang nadunggan sa amahang nisinggit ang biktima pagkaigo sa kutsilyo nag-unay usab kini dayun og dunggab sa kaugalingong tiyan.
Ang duha gidala sa mga silingan ug mga pulis sa Vicente Sotto Memorial Hospital samtang na-recover ang nagkadugong kutsilyo diha sa crime scene.
Hinoon matod ni SPO2 Arnado luwas na sa peligro ang duha samtang gitun-an na ang kasong ipasaka unya batok sa amahan.