Inahan sa katabang nangita’g hustisya

Dili gihapon madawat sa ginikanan ni Ermilisa Aba ang nahitabo niini sulod sa quarter ni Supt. Glenn Ares, ang hepe sa Parian Police Station 1 isip ilahang katabang human sa nanggawas nga report nga naghikog kini.

Apan ang inahan ni Ermilisa nga si Lilia Aba naglisod pagdawat nga naghikog ang iyang anak uban sa pagduda nga kini gituyo sa pagpatay.

Gituohan nga naghikog ang biktima tungod kay kini giingong gikasab-an sa asawa ni Ares human makahimo og kasaypanan. 

Gani gikataho nga negatibo ang resulta sa gihimong autopsy sa patay’ng lawas sa biktima ug giingong walay nahitabong foul play niini.

Apan wala makumbinsir si Lilia sa maong resulta hinungdan nga kini nagpatabang sa National Bureau of Investigation (NBI-7) nga mapahigayon ang re-autopsy.

Gawas niini, si Lilia nga molupyo sa barangay Buot-Taup ning siyudad nibisita usab sa buhatan ni Mayor Tomas Osmeña kagahapong adlawa ug nangayo og tabang sa mayor pagpangita og hustisya.

“Mangayo gyud ko og hustisya sa kamatayon sa akong anak kay dili ko makatoo nga naghikog to siya, gipatay gyud to,” sumala ni Lilia Aba.