Supporter ni Granada gi-ambush sa supporter ni Baquerfo sa Tudela

Subli na usab nga mitumaw ang kasamok diha sa lungsod sa Tudela sa Isla sa Camotes human mipasangil ang mga supporter ni Demetrio Granada nga girakrakan sila sa batabata ni Mayor Rogelio Baquerfo.

Si Ryan Estrera,29, kagawad sa barangay Northern Poblacion ug naila na nga supporter ni Granada nagpa-blotter sa kapulisan ug mipasangil nga gipusil sila sa batabata ni Baquerfo nga naila lang sa ngalan  si JR del Corro, nga taga barangay Calmante.

Sumala pa ni Estrera nahitabo kini niadtong Miyerkules sa alas 8:30 sa gabii samtang sakay siya ug mga kaubanang sila si Pablito De Ocampo, 57, Ruben Gonzales, 50, ug usa ka Rolito Mariamonte Jr., 21   sa multicab sa ilang barangay kalit silang giatangan sa suspek ug girakrakan.

Matod ni SPO3 Edison Torres, desk officer sa Tudela Police dihang nahinabi sa Banat News walay naigo sa maong hitabo gawas lang sa nabuslot nga atubangang bahin sa multicab.

Ang kapulisan naka-recover og usa ka kabhang nga bala sa kalibre .45 ug gi-andam na nila ang kaso nga ipasaka batok sa gitumbok nga suspek.

Sila si Baquerfo ug Granada higpit nga managribal sa politika ug parehong nangangkon nga maoy nidaug pagka mayor sa maong lungsod.

Si Baquerfo maoy gi-proklamar nga nidaug sa nilabay’ng 2007 election apan gikwestyon ug niapilar si Granada ug nangangkong siya maoy gi-proklamar nga mananaug sa korte human sa recount.

Apan subay sa report wala pa gyud kini mahusay sa hingpit gumikan kay ang kaso atua na gipasa  sa Comelec en banc.