Gipatas-an sa warden sa Talisay City Jail ang seguridad sukad nasulod ang tulo ka suspetsadong mitagod sa duha ka babaye gumikan sa kabalakang dunay mopasipala kanila.
Si Jail Chief Inspector Johnson Calub sa pakighinabi niini sa Banat News kagahapon mibutyag nga gipun-an pa niya ang paghigpit sa seguridad sa city jail sukad nga gisulod sila si Joseph Roy Cellar, Richard Gudelosao ug Jean Antonette Medalle kinsa maoy mga suspetsado sa pagpatay ug pagtagodtagod sa mga lawas nila ni Maria Eva Mae Peligro ug Gwendolyn Balasta.
Matud sa warden hasta ang mga mobisita sa maong prisohan ila sad gihigpitan tungod kay dunay posibilidad nga dunay magtinguha sa kinabuhi sa mga suspetsado.
Sila si Gudelosao ug Cellar gibuwag og karsel samtang gisagol ngadto sa mga prisong babaye si Medalle.
Ang nahisgutang mga suspetsado maoy pabut-on ni Calub kun moatubang ba kini sa mga tawo nga mobisita kanila aron malikayan ang disgrasya.
Matud pa sa warden gumikan sa kagrabe sa krimen dako ang posibilidad nga daghan ang nasuko sa tulo bisan gani ang mga tawo nga walay labot ang gustong mopasakit kanila.
Atol unya sa pagtambong sa mga hearing sa kaso sa tulo higpitan gihapon ang seguridad sa tulo pinaagi sa paghatag og daghang escorts.
Niadtong Huwebes usa ka adlaw ang milabay sa pagkatingkagol sa tulo diha sa city jail wala pay bisan usa nga mibisita kanila.
Ang Talisay City Jail ang gilangkuban sa unom ka cottage diin aduna na kini karon 330 ka mga piniriso 46 niini mga babaye ug 284 ang mga lalaki.