Dengue cases padayong nisaka

Nagpadayon gihapon pagsaka ang mga kaso sa dengue sa dakbayan sa Sugbu nga nikalas na og ubay-ubay nga kinabuhi.

Gikan sa buwan sa Enero hangtud niadtong Hulyo 26, ang siyudad duna nay 549 ka dengue cases ug 33 na ang namatay sa maong sakit.

Kini mas taas itandi sa susamang period sa miaging tuig nga duna lay 429 ka kaso ug lima lang usab ang namatay.

Gitataw hinoon ni Konsehal Christopher Alix nga nagpadayon ang kampanya sa dakbayan batok sa nahisgutang makamatay nga sakit sama sa mist spraying sa mga barangay nga dunay dagha’g kaso sa dengue, gawas sa pag-edukar sa mga molupyo.

Taliwa niini ang konsehal nga maoy chairman sa Committee on Health sa City Council subling nanawagan sa mga Sugbuanon nga motabang sa ilang kampanya.

Kini pinaagi usab sa pagpanglimpyo sa palibot, pagyabo sa mapundong tubig ilabi na nga nasinati na usab sa dakbayan ang mga pag-uwan.

Una nang gikabalak-an sa City Health Officer nga si Doctor Fe Cabugao, nga mosaka ang mga kaso sa dengue sa mosunod nga mga buwan.

Kini base usab sa dengue cases sa miaging tuig nga niabot og 1,841 gikan sa buwan sa Hulyo ngadto sa Disyembre.

Sama kang Alix, si Cabugao niawhag usab sa mga Sugbuanon nga motabang sa ilang anti-dengue campaign.

Sa iyang bahin, si Mayor Tomas Osmeña nag-andam na og advertising materials nga ipasalida sa telebisyon aron magpakita sa epekto sa matakbuyan sa nahisgutang sakit kung dili magpakabana ang katawhan sa paglikay niini.