Mga residente sa Pasil nag-people power vs polis

Mga residente sa sitio Lawis sa barangay Pasil ning dakbayan ang nag-“people power” ug gibato ang mga nagpatrolyang police nga misikop sa ilang silingan tungod sa pasangil nga kini nagdala-dala og armas niadtong milabay’ng gabii.

Ang gibato apan walay nareport nga nangaigo mao ang nagpatrolyang grupo ni PO1 Marvin Sanson sa Miscellaneous team sa San Nicolas Police Station nga nagpahigayon og foot patrol sa maong dapit.

Sumala pa sa report sa kapolisan, ang grupo nagpatrolya niadtong tungura sa maong dapit dihang naagian nila si Giovanni Aban alyas “Bani”, hingkod ang panuigon ug residente sa maong dapit nga may gisukbit nga armas.

Tungod niini dali nila kining giduol ug gisikop ug nakuhaan og usa ka .22 kalibreng magnum revolver nga may sulod nga upat ka buhing .22 magnum nga bala, dihang gipangitaan og papeles wala kini napakita kanila hinungdan nga kini gisikop.

Apan sa dihang ilaha nang naposasan ang suspek gikatahong kalit silang gibato sa mga tawo ug mga estambay aron unta “luwason” si Aban hinungdan nga nipabuto og armas si Sanson aron sila pakgangon.

Wala hinuon maklaro sa kapolisan kung si kinsa ang mga namato sa mga polis apan  gituuhang mga kabanay ug higala kini ni Aban.

Ang kapolisan daling mibiya sa dapit ug gikatakda kagahapon nga kini pasakaan og kasong paghupot og di lisensyadong armas si Aban.