Bombero  sa Talisay gipriso

Nagtingkagol sa prisohan sa Talisay  ang usa ka bombero nga nadestino diha sa Talisay City Fire Station gumikan sa kasong “acts of lasciviousness”.

Si FO2 Exur Campaña,  nasikop sa mga polis niadtong Martes sa buntag pinaagi sa  warrant of arrest nga giluwatan ni Judge Mario Manayon sa Municipal Trial Court in Cities sa dakbayan sa Talisay.

Si Campaña gimandoang  pabayaron og P12,000 nga piyansa alang sa iyang temporaryong kagawasan.

Si Talisay City Fire Marshal Felipe Canillas sa pakighinabi sa Banat News kahagapon mitataw nga nahibulong na lang siya nga nagtingkagol na sa detention cell si Campaña, tungod kay wala man siya’y nadawat nga reklamo batok kang Campaña.

Matud ni Canillas nga kung kabahin sa pagpahigayon og trabaho, dili ligoy nga motrabaho si Campaña.

Si Canillas midugang nga makabalik sa iyang trabaho si Campaña kung makagawas na kini gikan sa stockade tungod kay ang kaso niini dili man kabahin sa iyang trabaho, kundi  usa man ka personal,  gawas lang kung mapamatud-an ngadto sa korte nga sad-an gyud siya.

Kahinumdoman nga si Campaña  napusilan sa kanhi kapitan sa barangay San Isidro nga si Regino Sanchez nga iyang padrino sa kasal sa milabay'ng tuig, tungod kay nangulata kini sa iyang asawa.

Tungod sa kahadlok, ang iyang  asawa diha motago sa balay ni Sanchez,ug si Campaña nga miapas sa iyang asawa didto na manghasi sa balay ni Sanchez.

Gumikan kay gipanlimbuwad niya ang binggohan ni Sanchez, nasamdan ang asawa sa kapitan, hinungdan nga sa kapungot ni Sanchez giluthang niini sa Campaña.