Kapitolyo nakadaginot og P13.6 milyones

Ang kagamhanan sa probinsya sa Sugbu ang nakahipos og P13.6 milyones sa miaging tuig tungod sa programa ni Gobernador Gwendolyn Garcia sa pag-outsource sa mga personnel.

Si provincial accountant Marieto Ypil sa iyang taho nagkanayon nga ang Kapitolyo nakahipos 19 porsiyento sa dihang direktang nanawat og regular nga empleyado ug casual personnel nga makatapak sa mga bakanteng posisyon.

Sa medical personnel sa mga district hospitals, sama pananglit ang Kapitolyo nibayad og P25.4 milyones ug direktang nang-hire og mga personnel apan gumikan sa outsourcing ang probinsiya nibayad na lang og P20.2 milyones ngadto sa mga agency.

Samtang sa non-medical personnel ang Kapitolyo nigasto og P13.1 milyones apan ang probinsiya nibayad lang sa kantidad nga P9.6 milyones ngadto sa mga agency.

Ang maong programa nakahipos sa kinatibuk-an og P4.9 milyones gumikan kay ang Kapitolyo nagbayad na lang og P28.6 milyones imbes P33.5 milyones ang naandang balayranan sa miaging tuig.

“The general policy of Cebu Provincial Government under the leadership of the honorable Governor Garcia is to save on cost where needed without jeopardizing the delivery of basic services to its constituents,”

Niining paagiha labaw nga makadaginot ang kagamhanan sa probinsiya sa Sugbu  ingon man nagpadayon usab ang pag-alagad ngadto sa katawhan.

Sa mga district hospitals wala pay nasugatang  problema sa higayon nga mo-absent ang usa o duha ka  personnel, ang agency na maoy mangita’g paagi nga duna silay ipadalang laing trabahante aron mohulip sa ningpalta.