Tomas way hanaw sa aksidente

Walay kalibutan si Mayor Tomas Osmeña sa usa ka hitabo niadtong miaging Sabado diha sa South Road Properties (SRP) atbang mismo sa Sugbu building.

Usa ka motorista ang nakabsan sa iyang kinabuhi dihang nalagpot sa iyang gisakyang motorsiklo human gidaro sa usa ka multicab ug napasok sa laing sakyanan.

Ang biktimang sakay sa motorsiklo giila nga usa ka Jorge Cabasa, 50, molupyo sa barangay Mambaling ning siyudad.

Samtang ang drayber sa multicab nga midaro sa motorsiklong gimaneho ni Cabasa mao si Joey Lagancia nga taga barangay Lahug.

Naangol usab si Lagancia sa maong hitabo human makaangkon og mga samad ug  bun-og sa nagkadaiyang bahin sa iyang kalawasan.

Ang drayber sa laing pribadong sakyanan nga gikadasmag sa multicab nga si Allan Sabandal mibasol sa kakuwang og signage sa SRP nga maoy hinungdan sa disgrasya.

Nasayran nga niadtong miaging Sabado, gihimong one-way ang SRP tungod usab sa kalihukan sa Association of Barangay Council (ABC). Nadungan kini sa ika-60 nga adlaw’ng natawhan ni Osmeña.

Kini mao ang Walk For A Healthy You diin nanglakaw ang mga barangay officials gikan sa Malacañang sa Sugbu paingon sa Sugbu Homes sa SRP.

Bugtong giasoy sa mayor nga iya nang gipailisan ang mga traffic sign diha sa SRP gawas sa planong pagsira sa island diha sa South Coastal Road.