Media seminaron bahin sa HIV-AIDS

Ipaubos sa usa ka seminar ugmang adlawa ang mga sakop sa media dinhi sa Sugbu kalabot sa Human Immunodeficiency Virus-Acquired Immune Deficiency Syndrome kon HIV-AIDS.
Matud sa STD-HIV-AIDS coordinator sa Cebu City Health Department, Doctor Ilya Tac-an, sila dunay itudlo sa mga sakop sa Media atol sa ipahigayong AIDS Forum.

Partikular na niini ang paggamit sa mga pulong sa pag-report sa mga sinsitibong mga detalye labot sa HIV-AIDS cases.

Miingon si Tac-an nga ila usab nga ipahibawo sa mga sakop sa media ang kahimtang sa mga kaso sa HIV-AIDS sa nasud lakip na dinhi sa Sugbo.

“Maghatag lang mi og situationer sa AIDS cases sa national ug diri sa ato sa Cebu unya naa poy mga issues nga i-discuss,” sumala ni Tac-an.

Sa makausa pa giimbitar sa HIV coordinator ang tanang sakop sa media dinhi sa Sugbu pagtambong sa nahisgutang AIDS Forum.

Kini anha ipahigayon sa Sarrosa International Hotel diha sa  F. Cabahug ning siyudad gikan sa alas 9:00 sa buntag hangtud sa alas 2:00 sa hapon.

Nasayran gikan kang Doctor Tac-an nga niining tuiga, sila nakatala na og upat ka kaso sa HIV-AIDS dinhi sa Sugbo, diin duha niini ang mga lalake.

Niadtong miaging tuig, ang City Health nakatala lang usab og upat ka kaso sa nahisgutang makamatay nga sakit.

Niingon si Doctor Tac-an nga sa kinatibuk-an, moabot na sa 76 ka kaso sa HIV-AIDS ang natala sa City Health sukad niadtong 1989.   

Gipaabot nga mamulong sa AIDS Forum ang mga representante gikan sa Vicente Sotto Center, Department of Health ug sa City Health Memorial Medical Department.