Pawikan gibuhian

Gibuhian og balik ngadto sa kadagatan sa barangay Cotcot, lungsod  sa Liloan ang usa ka dakong pawikan nga gituohang gikan sa  Turtle Island.

Nakuha kini sa pukot sa usa ka mananagat  nga si Fely Alcover didto sa kadagatan sa Cotcot sa miaging adlaw.

Matud pa ni Alcover nga nakurat siya gumikan sa kabug-at  sa iyang pukot nga iyang  gisipong human iladlad sulod sa pipila ka oras sa dagat.

Nahuwasan siya dihang nakita niya ang usa ka dakong pawikan nga may 26 ka kilo ang gibug-aton, ug may 22 piyes ang gitas-on, ug 14 piyes  usab ang  gilapdon.

Dihadiha gitaho dayon  ni Alcover ngadto sa mga tinugyanan sa Bantay Dagat sa Liloan ang maong pawikan ug sa samang higayon gipahibawo usab dayon nila kini sa mga taga Department of Environment and Natural Resources (DENR) kinsa  maoy miila sa maong pawikan nga gikan  sa Turtle Island.

Ang Turtle Island maoy dapit nga nahimutangan sa kagatusan ka mga pawikan  nga maoy gibasehan sa ngalan ning maong isla ngaTurtle Island dinhi sa rehiyon.

Ang Turtle Island  higpit nga gipabantayan karon sa kagamhanan  aron kapanalipdan ang kinabuhi sa mga pawikan nga nagkanihit na karong panahona dinhi sa nasud.

Natino  sa mga otoridad sa DENR nga gikan sa Turtle Island ang maong pawikan gumikan sa ngalan niining gipapilit sa iyang bayanan nga nagdala sa usa ka timaan nga gikan  kini sa usa  ka protected area sa DENR ug Wildlife Bureau.