2 tiklo sa checkpoint

Nagtingkagol na sa karsel sa Talamban Police Station ang duha ka mga batan-ong nadakpan kay nagdala og armas de fuego nga walay lisensya, kutsilyo ug marijuana sa usa ka checkpoint sa may Borbajo St., barangay Talamban ning dakbayan, kagahapon sa kaadlawon.

Ang duha giila nga sila si Leonel De la Cruz, 21, Jeovani Borres, 21, nga pulos taga barangay Adlawon ning dakbayan.

Si PO3 Roberto Damaolao sa Talamban Police Station nga nahinabi sa Banat News nagkanayon nga ang duha nadakpan sa mga alas 4:00 pasado ang takna sa kaadlawon dihang ang grupo nila ni PO3 Jeovani Placencia ug mga kauban sa Talamban Police Station nagpahigayon og check point sa nahisgutang dapit.

Matud pa ni PO3 Damaolao nga wa ka-ugpo ang duha dihang gipara ang motorsiklo niini kay kadudahan kaayo ang ilang mga lihok.

Usa ka paltik nga .357 uban sa unom ka buhing bala ang nakuha gikan kang  Dela Cruz, samtang nakuha usab gikan kang Borres ang usa ka kutsilyo, ug  usa ka nilikit nga marijuana.

Gituohan nga ang duha adunay dautang plano apan gidemalas ug wala molampos, matud pa sa kapolisan sa Talamban.