Laing angle gisubay pagpatay sa 2 bata

Gawas sa gang related ang posibleng motibo sa pagpusil patay sa duha ka mga batan-ong giingong sakop sa usa ka gang diha sa eskina sa dalan Sabellano sa barangay Pardo gisusi karon sa kapolisan ang posibilidad nga mga tawong ilang gikaatraso tungod sa ilegal nilang kalihukan ang motibo sa pagbanhig kanila niadong Domingo sa udto.

Si Sr. Supt. Patrocinio Comendador nagkanayon nga duna sila’y nadawat nga report kabahin sa “shady activity” sa duha ug posibleng maoy usa sa rason nga sila gipatay.

Ang gipatay mao sila si Roel Batuto, 17, ug John Rey Genosas, 14, pulos residente sa samang barangay sa duha ka wala mailhing lalaking luwan sa usa ka motorsiklo samtang sila nagsakay sa usa ka traysikol.

Ang duha gitagsahan og pusil sa ulo sa backrider ug sa driver sa kolor blue nga motorsiklong kalit mibabag sa ilang gisakyan.

“As of now we can’t speculate immediately that the shooting is gang related, we are also looking into their backgrounds because we have received information they have derogatory or shady activities,” asoy pang Comendador.

Wala hinuon klaroha ni Comendador kung unsang mga kahiwian ang ilang gisubay apan sila nagtuong mao kini ang hinungdan sa pagpatay kanila tungod kay dunay nasilo niini bisan sa ilang kabatan-on.

Tungod sa maong hitabo dugang polis ang ibutang diha sa maong lugar sugod kagabii.