Lalaki naligsan sa trailer giangkasan; ulo napigsat

Napisat ang ulo sa usa ka 25 anyos nga lalaki human usab maligsi sa usa ka forwarder trailer truck mga alas 7:30 niadtong Domingo sa gabii diha sa may M.C. Briones ug Jakosalem, South Road Property (SRP) duol sa Cebu City Hall.

Si Traffic enforcer Manuel Tagaan nga gikahinabi sa Banat News miila sa biktima nga si Junevert Ornido,  25,  taga Kimba, barangay Cansojong, dakbayan sa Talisay.

Ang namatay   naligsan sa trailer truck nga  may plakang GFV622 nga gimaneho ni Garry Abella, 46, taga Basak, Lapulapu. Ang maong truck gipanag-iya sa Fast Loader Inc.

Matud pa niini nga ang trailer gikan sa  New Imus Road apan sa paghiabot diha sa may M.J. Cuenco diin “go signal”  kalit lang naligsan ang biktima.

Base sa report sa mga radio station gikatahong naandan na sa biktima nga panahon sa kagabhion mag-atang og mga sakyanan nga moagi diha sa SRP aron  maka-angkas pauli sa ilang pinuy-anan.

Apan sa dihang  mikapyot kini sa trailer  natapigas ang tiil human  nakapatong kini og oil sa   kilid hinungdan sa pagkahagbong ug naligsan sa luyong bahin nga ligid.