Polis girakrakan sa sikyu

Nagkapangos-pangos sa kalawasan ang usa ka sakop sa Service Security Group sa Cebu City Police Office nga nadestino sa usa ka outpost diha sa barangay Mabini taliwala sa nagkagubot nga utlanan sa yuta sa maong dapit human kini girakrakan ug naligid sa bakilid niadtong Domingo sa hapon.

Ang naangol nga polis mao si SPO2 Venerando Villaban kinsa miresponde sa alarma sa pagpabuto og armas diha sa sitio Loton sa maong barangay human usa ka Rolando Seno ang mitawag og nisumbong nga dunay tawong nangrakrak diha sa ilang lugar ug gituohang may tawong naigo.

Si Villaban dali dayong nakapahibalo sa iyang opisyal nga si Sr. Insp. Bonifacio Graciano kabahin sa hitabo aron mangayo og back-up, apan sa pag-adto ni Villaban sa naasoy'ng lugar uban ang usa ka konsehal nakugang siya dihang kalit siyang girakrakan sa usa sa mga sakop ni Rolando Seno gamit ang taas nga armas bisan siya nagpaila nga polis.

Si Villaban swerteng wala maigo sa pagrakrak apan sa panigurong dili maigo sa bala naligid ang maong polis sa bakilid ug nakaangkon og daghang mga pangos sa kalawasan.

Dihang siya nakarekober giaresto niini ang usa sa nirakrak kaniya nga usa ka gwardiya nga giilang si Reynaldo Alba Altar, 30, sakop sa CSIS Security Agency.

Gikatahong hubog si Altar nianang tungura ug nakuhaan kini og usa ka .38 kalibreng revolver nga may lima ka buhing bala.

Sila si Sr. Insp. Graciano mao nay midakop kang Arnado Suquite Talisik, 47, residente sa maong barangay kinsa positibo usab nga gitumbok ni Villaban nga usa sa mirakrak kaniya ug nasutang nakainom usab niadtong tungura.

Si Sr. Supt. Patrocinio Comendador director sa CCPO mipadayag sa iyang kasagmuyo sa nahitabo sanglit gihulagway niyang di makatarunganon nga hasta ang polis nga nagmentinar lang sa kalinaw giapil pagpusil.