Duha ka bata gipatay sa nagmotor

Duha ka gidudahang mga sakop sa Crips Gang nga pulos mga minor ang gipamusil patay sa duha ka wala mailhing mga lalaking nagsakay og motorsiklo diha sa eskina sa National Road ug dalan Sabellano sa barangay Pardo kagahapon sa udto.

Gidala pa unta sa Cebu City Medical Center ang 17-anyos nga si Roel Batuto apan gideklarar kining dead on arrival tungod sa usa ka samad pinusilan sa kilid sa ulo nga milapos sa pikas, samtang dead on the spot ang iyang kauban nga si John Rey Genosas, 14, tungod sa duha ka igo sa bala diha sa ulo.

Sumala pang SPO1 Rogelio Nedamo ug PO3 Buenaventura Ursaiz sa Homicide Section sa pakighinabi sa Banat News duha ka wala mailhing mga lalaki ang nagtagsa og pusil sa duha kinsa sakay sa traysikol niadtong tungura nga gimaneho ni Jeffrey Cartilla, 22.

Ang duha misakay sa maong traysikol gikan sa barangay Basak apan pag-abot diha sa maong eskina kalit silang gibabagan sa kolor blue nga motorsiklo, diin ang driver nagsuot og crash helmet samtang ang backrider nagsuot og itom nga jacket.  Ang backrider midiretso diha sa sidecar ug gipusil ang padulong unta og kanaog nga si Genosas makausa ug pagkahagbong giusban pa kini og pusil, samtang ang driver diha miadto sa likod ni Cartilla ug gipusil ang nag-backride nga si Batuto sa ulo.

Sumala pang Nedamo nagtinga na si Batuto dihang niresponde ang mga polis apan ila kining gidala sa CCMC sa tinguhang masalbar apan namatay gyud kini.

Usa ka kapsula sa .45 kalibreng bala ug duha ka .32 kalibreng bala diha sa crime scene. Ang mga mamumuno daling miikyas padulong sa Pardo.

Samtang gisubay karon sa Homicide Section ang koneksyon sa mga biktima sa nahitabong pagpamusil nga nakaangol og usa diha sa barangay Basak-Pardo sanglit usa sa mga gitumbok nga suspek giila lang sa pangalan nga “Junrey” ug giingong mga sakop sa Crips Gang ang mga responsable.