Talisay magpalumba og baroto

Ang kagamhanan sa dakbayan sa Talisay mopahigayon og “Baroto Regatta” atol sa piyesta sa maong lugar karong Oktubre 14-15.

Mao kini gibutyag ni kanhi Customs Collector David “Boy” Odilao, tsirman sa City’s Fisheries and Acquatic Resources Management Council (C-FARM-C) kinsa nagkanayon nga kining maong kalihokan usa ka lumba sa mga baroto kon sakayan sa kadagatan nga adunay layag.

Matud pa ni Odilao nga tadlason sa mga mosalmot ning maong lumba  ang kadagatan gikan sa Talisay paingon ngadto sa  Mactan Channel unya balik sa Talisay diin adto na dauga ang maong lumba diin gibana-banang dunay lima ka nautical miles ang gilay-on.

Ang maong lumba   adunay premyo nga P20,000 sa unang ganti, P15,000 sa ikaduha , P10,000 sa ikatulo,  P5,000 sa ikaupat, P3,000 sa ikalima, ug ang gikan sa ika-unom ngadto sa ikanapulong mananaog makadawat og tagsa ka sakong bugas humay.

Ang una ngadto sa ikatulong mananaog makadawat usab og tropiyo samtang ang ika-upat ug ikalima makadawat usab og  mga medalya gawas sa madawat nilang cash.

Gibutyag ni Odilao nga ang ilang tumong sa maong kalihokan mao ang paghinumdum sa mga nanglabay na nga panahon diin ang mga gamiton sa katiguwangan sa pagbiyahe sa kadagatan ug sa pagpangisda mao ang baroto nga dunay layag.

Ang makasalmot sa umaabot nga lumba sa sakayan kadto lamang sakop sa C-FARM-C ug mga rehistradong mananagat sa dakbayan sa Talisay.