Militante panid-an sa DSWD

Gipaabot nga sugaton og mga lihok protesta ang ika-walo nga State of the Nation Address (SONA) ni Presidente Gloria Macapagal Arroyo karong Lunes.

 Partikular na niini gikan sa mga militanteng pundok sa nagkadaiyang bahin sa nasod lakip na dinhi sa Sugbu nga kanunay’ng misaway sa administrasyon.

Kini tungod usab sa ilang mga demanda nga wala mahatag sa kagamhanan, sama sa pagbasura sa Oil Deregulation law, pagbasura sa EVAT law, ug usbaw sa suhulan.

Labaw sa tanan ang kapakyas sa nasudnong kagamhanan paghatag og kasulbaran sa padayong pagsaka sa presyo sa mga palaliton sama sa lana, bugas ug uban pa.

Apan sama sa nangaging mga lihok-protesta sa mga militanteng pundok panahon sa SONA sa presidente, gipaabot usab nga pipila sa mga raliyista magdala og mga menor de edad.

Tungod niini, ang mga raliyista gipahimangnoan nang daan sa consultant sa Department of Social Welfare and Development (DSWD-7) nga si Cebu City Councilor Gerardo Carillo.

Matud sa konsehal nga angayang likayan sa mga tawo ilabi na sa mga Sugbuanon nga moapil og mga lihok protesta nga magdala og mga menor de edad.

Kini aron malikayan nga mabutang sa risgo ang kabataan kung dunay mga kaguliyang nga motumaw atol sa maong adlaw.

“As much as possible, dili lang nila i-expose ang mga bata sa mga factors ba nga makapadaut nila like fronting the line exposing the children to danger,” sumala ni Carillo.

Sa samang higayon, gitambagan sa konsehal ang DSWD-7 nga monitoron usab ang kalihukan sa mga militanteng pundok nga mag-rally karong Lunes aron dili magamit ang kabataan sa maong kalihukan.

Napanglantawan nga ubay-ubay ang mosalmot sa ilusad nga march-rally karong Lunes dinhi sa Sugbu tungod usab sa pagsalmot sa nagkadaiyang mga tinun-an.

Gani dunay report nga may mahitabong mass walk-out sa mga tinun-an sa nagkadaiyang mga kolehiyo ug unibersidad dinhi sa siyudad.