...pagpangita sa parte sa lawas, PNP naglisod

Pagpangita sa ubang plastic bags nga gisudlan sa gi-chop-chop nga mga babaye naglisod pagpangita ang kapolisan gumikan kay ang mga suspek naglisod na sa pagtultol diin nila gilabay.

Kagahapon sa buntag gikuyog sila si Richard Gudelosao ug Jojo delos Reyes sa mga polis sa Minglanilla inabagan sa mga sakop sa Talisay City police station ug Scene of the Crime Operation diha sa nagkadaiyang lugar sa bukirang bahin sa Minglanilla.

Nakit-an sa grupo nila ni Sr. Insp. Romeo Santander ang duha ka itom nga plastic bags nga dunay sulod nga batiis sa babaye sa Campo-5 sa Manipis dakbayan sa Talisay.

Samtang nakit-an usab ang duha ka ulo sa mga biktimang sila si Eva May Peligro ug katabang nga si Gwendolyn Balasta diha sa barangay Campo-8 lungsod sa Minglanilla.

Ang ulo ug nawong ni Peligro gikatahong giabisan og ilong dunay dakong hiwa sa walang aping ug nabulit sa nabagtok nga dugo, bisan naguba na og maayo ang nawong niini gituuhang mao kini si Peligro gumikan kay pution ang panit niini.

Ang duha ka mga ulo gipunit na sa mga residenteng maoy nakakita niining ulo ug ingon man sa ulo nga gituuhang iya ni Balastas nga itomon ang pamanit ug gibutang sa mga residente sa gutter sa kalsada, ang duha ka ulo nakit-an gibana-banang tag 50 metros ang gilay-on sa usa’g-usa.

Laing paa ug kaputol sa lawas sa usa ka babaye gikan sa hawak hangtud sa may kinatawo ang nakit-an diha daplin sa sapa kilid sa karsada sa sitio Quarry barangay Uling siyudad sa Naga nga sumala pa sa mga residente nakit-an pa nilang giilugan sa mga iro.

Samtang napalgan usab sa mga residente ang mga underwear sa mga babaye diha sa sitio Calanganan barangay Lutac siyudad sa Naga human matultuli sa mga iro tungod sa nangalisbong baho sa dugo.

 Gibutyag ni Santander sa Banat News nga ilahang suwayan og sumpay ang mga putol nga lawas diha sa Saint Francis Funeral Homes pagtino kun duna paba’y kulang aron mapangita kini og tiwas.

Gikatakdang pasakaan og kasong double murder  ang mga suspek karung adlaw’ng   Lunes.

Miangkon hinuon ang duha nga sila tiggamitan og marijuana ug shabu kaniadto pa apan nianang adlawa pareho silang nakainom ug giingong nakahithit usab og marijuana.

Gipahibalo ni Santander base sa pamahayag sa SOCO nga mao kini maoy labing unang brutal kaayong pagpatay nga ilang nasugatan karong mga panahona gumikan kay kaniadto kung duna may makit-ang chop-chop lady usa ra gyud ka biktima.