Suspects sa ‘chop-chop’ dakpan

Wala na makaagwanta sa batasan. Kini maoy gipangangkong hinungdan nganong nahimo sa tulo ka suspek ang pagpatay ug pag-chop-chop sa duha ka babayeng nangapalgan diha sa Campo 8 sa Minglanilla.

Nadakpan sa mga sakop sa Minglanilla Police Station ang tulo ka mga gidudahang suspek brutal nga pagpatay ug pag-chop chop sa dili usa (sukwahi sa unang nigawas nga report) kundili duha ka mga babaye.

Ang gidakop mao ang manag-live in partner nga sila si Richard Gudelosao , 27 nga nagpuyo diha sa Block 3 Lot 4 sa Azienda Firenza sa barangay Maghaway dakbayan sa Talisay; Jean Antonette Medalle, 26, taga sitio Maracas sa barangay Lahug, kapuyo ni Gudelosao ug Jojo delos Reyes, 23, lumad nga taga barangay Cogon, Ozamis City.

Giila ang duha ka chop-chop lady nga sila si Maria Eva May Peligro, 27, kinsa gikatahong nagpaabot nalang unta sa resulta sa board examination niini sa kursong nursing ug ang ilang katabang nga si Gwendolyn Balasta,19.

Ang tulo nadakpan sa managlahing higayon sulod sa Azienda Firenza human gimando ni Sr. Insp. Romeo Santander, hepe sa Minglanilla police station nga i-hold si Gudelosao tungod kay ang igsuon ni Peligro nga si Grace Ybañez midangop kanila aron magpa-blotter nga kini na-missing.

“Kining igsuon ni Peligro nianhi dinhi kay mo-report og missing person kay wala na nila ni siya makontak unya duna may report nga may nakit-ang chop-chop lady mao to among giadto sa punerarya,” asoy pang Santander.

Sumala pang Santander sa paghulagway sa igsuon dunay dakong alom sa kilid sa lawas, pution ug seksihon ang lawas ni Peligro apan ang sulod sa inisyal nga garbage bag nga ilang nadiskubrehan ug nadala sa punerarya itumon ang lawas sa babaye apan dunay gamay nga bukton nga mitakdo ang ubang parte sa duha ka na-missing.

Tungod niini nagduda silang posibleng duha ka tawo ang gigutadgutad nga lawas ug gisagol-sagol nalang ug dunay posibilidad nga duna pay laing mga plastic bags nga wala pa makit-i.

Si Gudelosao gi-hold diha sa gwardiya sa gate kauban si Medalle samtang si delos Reyes nadakpan diha sulod sa iyang katulganan sa balay sa iyang agalon nga silingan nila ni Gudelosao.

Matud pang Santander miangkon dayon si delos Reyes sa krimen samtang si Gudelosao mihimakak pa niini apan dangtan pila ka oras miangkon na kini sa krimen.

Dugang pang Santander si Gudelosao maoy giingong migulgol sa liog sa mga biktima samtang si delos Reyes maoy mipugong niini, gikatahong gituok una nila kini una pa gisugdan og chop-chop sulod sa kasilyas ug gipanulod diha sa garbage bag.

Samtang si Medalle, sumala pang Santander makunsiderar nga accessory to the crime gumikan kay wala kini diha sa aktuwal nga pagbuhat sa krimen kundili duna kini kasayuran sa plano ug mao usab ang mitabang sa paglimpyo sa mga lama sa dugo diha sa crime scene sa balay.

Gikatahong nipalit pa ang mga suspek og alcohol, pesticide, asin ug air freshener aron malimpyuhan ang dapit diin mahitabo ang pagpatay ug aron usab di mahalata ang langsa kaayong baho sa dugo sa tawo nipalit usab sila og isda aron matabunan sa baho niini ang kaanghit sa palibot.

Si Medalle sa iyang bahin mitug-an nga gipukaw siya sa iyang bana ug ni delos Reyes diha sa Maracas, Lahug niadtong Huwebes sa gabii ug gipakuyog diha sa Talisay ug gimandoang palimpyuhan ang crime scene.

Matud pa niya wala gyud siya makakita sa patay’ng lawas sa duha atol sa iyang pag-abot ug nagtuo siyang nalabay na kini sa mga suspek.

Nagkanayon si Medalle nga duna siya’y aligutgot kang Peligro apan “madala-dala ra” maong nakadesider kining mouli nalang sa ilang balay sa Lahug apan nasayod siyang duna nay plano ang duha batok kang Peligro.

Apan gumikan sa hulga ug kahadlok nga apilon og patay ni delos Reyes ug sa bana gitak-om nalang niini ang baba ug hangtud nga niabot ang higayon nga nahinayon gyud ang plano sa duha ug siya maoy gisugong manglimpyo.

Si Gudelosao sa iyang bahin nitug-an nga nagsugod ang iyang aligutgot kang Peligro gumikan sa pagkapiit sa iyang anak sa pultahan nga diin sila pa hinuon maoy gisumbong sa biktima ngadto sa iyang inahan sa Estados Unidos, ug ang pagpunay niini og panguha og litrato pinaagi sa cellphone sa ilang mga sayop bisan na ang nagkatag nga gamit diha sa ilang panimalay ug ipadala ngadto sa ilang inahan hinungdan nga nasuko ang naulahi kanilang magtiayon.

Usa na niini ang pagsige og sumbong ni Peligro bahin sa iyang pag-inom inom ug ang pagsige og lakaw sa asawa niining si Medalle ug uban pa hinungdan nga napuno na kini ug nakadesider nga patyon ang biktima, apan nadamay si Balasta tungod kay kini gidudahan nilang nakamatikod sa ilang gihimo kang Peligro niadtong higayuna.

Nunot sa pagkasikop sa tulo, gihulagway ni Santander nga sulbad na ang maong kaso apan ilaha pa kining i-turn over ngadto sa Talisay City Police station ang imbestigasyon sanglit diha mahitabo ang krimen sa ilang hurisdiksyon.