Nagsansan og dinamita nabuthan

Naputol ang walang kamot sa usa ka mangubkobay og Mactan stone human kini mabuthi sa dinamita sa barangay Marigondon dakbayan  sa Lapulapu sa milabay’ng hapon.

Ang biktima mao si Melvin Barbadillo, 29, lumad sa barangay Pulpogan lungsod sa Consolacion ug usa ka stone craft worker.

Base sa pamahayag ni Barbadillo atol sa pakighinabi sa Banat News nangubkob sila og mga Mactan stones sa maong dapit ug siya maoy misansan sa usa ka dinamita sa lungag nga iyang gihimo.

Apan sa tanto niyang dukdok aron ang dinamita masulod sa bangag kalit kini nga miulbo sa iyang atubangan ug tungod sa kakusog sa pag-ulbo naputol ang iyang walang kamot ug ubay-ubay nga samad sa kalawasan ang iyang nahiaguman hinungdan sa pagkalandig niya sa Vicente Sotto Memorial Medical Center.