Tulisan naaktuhan arestado

Nagtingkagol na karon sa karsel sa kapulisan sa dakbayan sa Sugbu ang tulo ka gipasanginlang tulisan human masikop sa Mobile Patrol Group ug Police Station 2 sa managlahing higayon kagahapon.

Nadakpan kagahapon sa buntag human tulisa si Perla Tarona, 50, sulod sa PUJ diha sa may dalan Unit 2 Carbon dalan Magallanes ning dakbayan, mao sila si Jundy Pacayo, 25 ug Robert Arong, 22, pulos mga traysikad driver ug managbayaw sa barangay Tangke dakbayan sa Talisay.

Ang duha nasikop nilang SPO2 Narciso Ursal, PO3 Reno Torrefranca sa MPG 016 atol sa ilang motor-checkpoint sa maong dapit human dunay drayber sa jeepney ang mipahibalo kanilang tulisan ang duha ka tawong naglakaw sa unahan.

Diha-diha daling gigukod sa mga polis ang duha kinsa pulos nakalitan ug wala makaporma maong sila nadakpan ug nakuhaan og usa ka bag, usa ka kalibre. 357 rebolber ug walo ka buhing bala, usa ka kutsilyo, duha ka relo nga ang usa kang Tarona, kwartang P1,200, mga pitaka, duha ka cellphone nga ang usa gipanag-iya ni Tarona ug 2 dolyares.

Si Pacayo bag-ohay lang nakagawas sa prisuhan sa Talisay City Jail sa Maghaway niadtong Hunyo 25 sa kasong illegal drugs.

Laing nadakpan mao si Roberto Plarisan, Jr. 20, taga sitio Katangkungan sa barangay Sambag Uno ning dakbayan kinsa napusilan sa mirespondeng sila si SPO1 Jose Rodulfo Ebale, Jr. ug PO1 Rhea May Tinoco nga mga sakop sa Night Watch Patrol diha sa dalan Osmeña Blvd. kagahapon sa kaadlawon.

Matud pang Chief Insp. Henry Biñas, hepe sa Fuente Police Station sa pakighinabi sa Banat News nga wala mopatuo si Plarisan ug misuway pa og atubang sa mga polis nga migukod kaniya maong siya napusilan.

Si Plarisan naigo diha  sa tuong kamot ug ang bala milagbas diha sa may sampot niini apan dali rang natabang ug nadala sa tambalanan apan ang kauban niini nga maoy nagdala sa cellphone ug P2,000 nga kwarta sa biktimang si Jermy Amitin,20, wala na maapsi.

Samtang sa laing bahin duha usab ka mga mangunguot ang nadakpan nila ni Sr. Inspector Michael Bastes, hepe sa Theft and Robbery Section diha sa may dalan Sanciangko.

Ang duha nga nasikop mao sila si Jay Jagoros, 22, Ruben Bauro, 22, pulos taga Carmen, Cagayan ug temporaryong nagpuyo sa sitio Langub sa barangay Guadalupe.

Matud pa ni Bastes pagkakita palang kanila sa duha kalit na silang nanagan maong ila silang gigukod hangtud nga nadakpan. Nagduda ang kapolisan nga mga mangunguot ang duha sanglit sila mitug-ang ang ilang modus mao ang “Dosdos” kon laing tawag sa pagpanguot sa Cagayan.