SONA hambog ra

Si Sen. Mar Roxas miawhag ni Pres. Gloria Macapagal Arroyo nga motutok paghimo nga kugihan sa mga kabus kay sa pagpanghimo og mga programa nga igo lang manghatag. Kini samtang gipaabot nga ilusad sa presidente atol sa iya unyang State of the Nation Address ang National Social Welfare Program.

Dungan niini, si Roxas mipalabang og balaodnon nga maghatag sa kagamhanan og short-term ug long-term plans ug pamaagi alang sa dinaliang pagkab-ot sa “rice sufficiency” ug “long-term food security” aron masugdan ang pagatawgon og “agriculture renaissance” sa nasud.

Sumala pa ni Roxas nga sama sa nangaging SONA, mapaabot nga ilitaniya ni Arroyo ang mga “dole-out programs” imbes pagpalambo sa mga kabus, ilabi na ang mga mag-uuma nga nag-ani na og hilabihan kagamay ug ang kita dili na ikatugbang pagbuhi sa pamilya.

Gihulagway hinuon niya nga ang maong mga programa nga pagpanghatag og subsidy sa kuryente gikinahanglan aron matabangan ang mga kabus, apan dili kini maoy tubag sa nagpadayong food ug oil price crisis.

Si Roxas, presidente sa partido Liberal, mitataw nga ang labing importante mao ang dinaliang tubag sa kalisud.

Ang Senate Bill No. 2469, o ang Immediate Rice Security Bill giduso ni Roxas. Niining maong balaod mahimo ang Fertilizer Support Program (FSP) sa tanang mag-uuma ug ang pagrestructure sa National Food Authority (NFA).

Laing misaway sa SONA ni Arroyo si kanhi Mayor Alvin Garcia.

“Sa akong na-obserbahan, lahi man kaayo ang gisulti sa presidente sa atong makita, nagkadaghan man hinuon ang nagkalisud-lisod niining panahona,” si Garcia nagkanayon, kinsa midugang, “ang gipamulong sa presidente rosy kaayo pero that is not the reality nga atong nakita, they are not realistic,” si Garcia miingon.

Nasayran sa survey sa Pulse Asia nga 40 porsiyento sa mga Pilipino miingon nga dili matinud-anon ang SONA mas taas itandi sa miaging tuig nga 29 porsiyento.